Esta es , la kestyon ke se pozan, en majorita, los mansevos, ma espesyalmente, las ijas. Eyas, aktualmente, no keren solo ser espozas, ma, tambyen, mujeres ke tyenen i kriaturas i karyera..Puede ser ke es el dezeo de “independensya ekonomika”…Pensan: ”Si esto ganando i reushendo a alkansar a mis menesteres, porke no profitar?”
Naturalmente, ay i otros faktores, ke de una manera, estan “ovligando” la mujer a lavorar. Se puede dezir, ke, mas muncho de ovligasyon, es un “menester” materyal. Oy, marido i mujer estan lavorando para luchar mano kon mano, la vida azyendose mas difisil de diya en diya. Espesyalmente, kuando ay kriaturas, los gastes, munchas vezes estan depasando el budjeto de una famiya medyana.
Avlimos de syertos kavzos ke ovligan la mujer a lavorar. Devemos konsiderar i aspektos diferentes de la kestyon. Por egzempyo, la ija ke izo altos estudyos, ke ya lavora de antes de kazar, ke ya alkanso a una pozisyon en su karyera. Eyas tambyen, se topan enfrente de un dilemno, kuando se kazan, o, estan para kazar: “KARYERA O KRIATURA?…
Seguro, ser madre es un sentimyento inkomparavle. Ma, komo dishimos, se trata de una mujer en alta pozisyon, o, a lo menos, en buen estatuto. Munchas, al koste de atrazar la felisidad de ser madre, dan la prioridad a la karyera. Estas, de un punto de vista, tyenen el lukso de permetersen a eskojer esta alternativa. Pensan tambyen, ke no pueden reushir a yevar todas las doz alternativas ENDJUNTOS. Preferan dar sus enerjia i sus tyempo al lavoro, sin tener otros penseryos. Porke, para eyas, tener ijos, es importante. Los chikos tyenen menester de sus madres, i en vezes, “full time!” Esto es un punto de vista, i, komo syempre, yo lo respekto.
El dilemna empesa en jeneral, kon el nasimyento del bebe. Ay mujeres, kaji en la mezma pozisyon de las de arriva. Eyas preferan dar un entervalo de unos kuantos anyos. Seya ke estan seguras de topar echo mas despues, o seya por otras razones. Mezmo si no es personalmente, yo konosi kavzos semejantes en mi derredor.
Ke pueden ser las otras razones?…El ombre puede tener buena situasyon, sufizyente para alkansar a todos los menesteres. En esta kategoriya, sin problemas ekonomikos, la mueva madre se kere okupar personalmente de su bebe fin a una syerta edad. Pensa tornar mas tadre a su echo. En realidad, es un estado muy pozitivo del punto de vista de la kriatura, ke se engrandese, sintyendo la kalor i la serkor de su madre.
Ke puedemos dezir de las madres, ke a todo presyo, dezean kontinuar a lavorar?. Bueno, si tyenen los remedyos, preferan angajar una buena dada. Ma, ay i las madres ke son ovligadas de kontinuar a lavorar, djustamente, por menester materyal. No tyenen el lukso de dar un entervalo, porke ay el riziko de no topar despues, un buen empyego o, mezmo, un simple echo, fasilmente. Komo no keren tomar este riziko, angajan una ayudante (en jeneral por el diya), al koste de pagar la mitad de sus mezadas…
Mi opinyon es, ke si ay remedyos ekonomikos, es preferavle de kedar en kaza, i okuparse de las kriaturas, a lo menos, por un syerto tyempo. Munchos van a pensar ke kedi muy demode. Ma, no me importa!, syempre tuve el uzo de dezir libramente mis ideas!…Portanto, ay un punto ke esto enteramente de akordo: lavorar, es uno de los derechos de la mujer. Aktualmente i los maridos se estan aserkando kon mas entendimyento al lavorar de sus espozas. .
Komo en todo modo de kavzos, no se puede jeneralizar, ni en este. Ay diversas solusyones, apropyadas a kada kavzo. Los djenitores, naturalmente, kon sezudeza, kon maturidad, van a reushir a toparlas.- Aserkandomos del 8 Marso, OTRUNA VEZ eskoji esta tema, ande se trata tambyen,del derecho de lavorar de la mujer. Komo se save, 8 Marso, es el Diya Universal De Los Derechos De La Mujer. C.D.
