Ayer era 14 Febrero

Coya DELEVİ Judeo-Espanyol
15 Şubat 2017 Çarşamba

Antes de ampesar al artikolo, esto supozando ke devo aklarar un punto. 15 de Febrero, en una manera es komo la kontinuasyon del sujeto Amor. Syempre se avlo, se eskrivyo bastante sovre el 14 Febrero, la St. Valentine. Kuantas personas konosen la egzistensya del Diya de Selibateryos? En inglez “Single”s Day, un Diya ke se fyesta el 15 de Febrero? Lo aviya meldado en una revista seryoza de sorte ke lo acheti sin dinguna ezitasyon. Espero ke no ize yerro.

En todo kavzo, no es un sujeto ke merese de ser egzajerado. Por ande lo miras, es una kestyon ke repoza mas o menos sovre el Amor… Komo de fakto, fue en sintyendo (no se por la kuantena vez!), la kantika El Amor del famozo Julio Iglesias, ke desidi en supito de azer este teksto…

“Single” es un byervo ke sinyifika tambien “solo”. I aki una chika remarka: Uno o una pueden ser selibateryos i no estar solos o solas, no es ansi?... El “Selibato” es el estado de la persona (ombre o mujer) ke no es kazado. I DEKE NO SE KAZAN?..

Naturalmente ay diversas razones, personal o jeneral. Por egzempyo, el reselo de pyedrer la libertad o la independensya o de no pueder adaptarse a la vida komuna. (esto puede ser mas muncho reselo maskulen). No aver enkontrado la persona djusta ets..Por siguro ke ay munchas razones diferentes. A esta lista puedemos adjustar el rekuerdo amargo de una vyeja deziluzyon ets…

Naturalmente i la kestyon de situasyon ekonomika es muy importante i penso ke djuga un rolo importante en la dechizyon de los ke pensan fondar una famiya. Antes egzistiya un otro djenero de impedimyento tradisyonal en syertas famiyas o en chikas komunidades. En muestros diyas no se si egziste este empidimyento o kostumbre. Me akodro muy bien de aver oyido esto i mezmo asisti a esto. Anyos antes konosi mansevos, mansevas ke, todo en estando espozados desde un syerto tyempo ke fueron ovligados de asperar el mazal o el kazamiento, “EL MAZAL” DE LA IJA DE KAZA.

Munchas vezes esta situasyon puediya turar mezes, afilu anyos. I, kon los ayres de estos anyos, los suenyos de felisidad de los mansevos se puediyan azer siniza munchas vezes. Oy no tengo entisyon de analizar mas demaziya este sujeto. En munchos artikolos de 14 Febrero ya tengo eskrito bastante sovre el Amor.

Lo mijor va ser de meter el punto final kon unos kuantos versos de la kantika “EL AMOR”

“El Amor, el AMOR, EL AMOR..

El amor a vezes nunka yega,

Porke pasa sin yamar,

Se va bushkando a ken avlar.

I, a vezes, kuando yega, yega tadre,

Porke ay alguno a su lugar…