Aun ke son muy reputados por la profundura de sus refleksyones, ay envezes en la manera de pensar de varyos grandes ombres “repuestas a diferentes de muestras kestyones sovre varyos sujetos” ke mos deshan en estado de perpleksidad i mizmo de dubyo.
Anyos antes, esto fue un poko el kavzo del livro entitolado “Reflexions sur la question juive” (Refleksyones sovre la kestyon djudia), ovraje muy selebre sinyado por el grande eskritor fransez Jean Paul Sartre i publikado en 1946, poko despues la fin de la salvaje “Segunda Gerra Mundyal” i ansi de la terrivle trajedia ke fue la Shoah.
La dicha ovra fue kon grande frekuensa meldada, analizada i komentada en el espasyo intelektual evropeo, ma de dos maneras kontraryas: a) Pozitivamente en grandes asembleas munchas vezes publikas, de parte de varyas personas de selebre reputasyon; o byen: b) Negativamente, kon envezes un poko de tristeza, en nombrozos grupos djudyos ande eya provoko amargas diskusyones entre diferentes myembros de la Komunidad djudia de Fransya.
Segun lo ke personalmente entendi i sovre baza de los nombrozos komentaryos ke tuve la okazyon de meldar a este sujeto, Jean Paul Sartre pensava entonses ke lo ke aze de un individuo nasido de una madre djudia “Un Verdadero Djudyo“, no es el fakto de ser el desendyente de una famiya ebraika (ombres i mujeres sin tyerra durante dos mil anyos de erransa i peregrinasyones) ni tambyen de apartener a una relijyon bazada sovre los sublimes preseptos etikos del Dekalogo ke es en realidad la baza fundamental de lo ke realmente es la verdadera Sivilizasyon.
Para el grande filozofo: “lo ke aze realmente de un djudyo “un Verdadero Djudyo” es la mirada de los otros, lo ke estos otros (los kualos en realidad le son ajenos) ven en el”.
En rezumen, Jean Paul Sartre mos dize ke “el djudyo es un ombre del kual la sola konsistensya es lo ke los otros ven en el”, i ke es solo ansi, ke el es konsiderado komo djudyo de parte de los ke no son djudyos”.
Independamente de esto, el filozofo afirma tambyen ke los djudyos son perfektamente asimilavles ma ke eyos se konsideran komo los ke las otras nasyones no kijeron asimilar, opinyon ke dyo nasimyento al antisemitismo.
Si, en el anyo 1946, para el grande egzistensyalisto: ‘Es la opinyon del ke es diferente de el, ke aze del djudyo “un autentiko djudyo” i no su orijen Mozaika ni la tyerra de Israel, la kuala portanto es el uniko refujyo ande, kualas sean las sirkunstansyas, el se syente verdaderamente djudyo.
El byen konosido eskritor adjunto tambyen ke mizmo en los espritos los mas evoluados ke afirman ser muy liberales i avyertos a los otros, puede aver trasas imperseptivles de un antisemitizmo sekreto del kual munchas vezes eyos mizmos no tyenen konsyensya, lo ke por egzempyo es el kavzo de nombrozos autentikos demokrates kristyanos los kualos sin mankar, se esforsan de provar sus amistad por los desendyentes de Moshe Avenu.
Para Sartre ay dos kategorias de djudyos:
A) “Lo autentikos” muy raros, ke afirman kon glorya sus verdadera identidad, al presyo mizmo de terrivles sufriensas ke eyos somportan kon estoisizmo, sin ninguna kesha ni tentativa de eskonder sus kondisyon de djudyos.
B) “Los in-autentikos” muncho mas nombrozos, los kualos malgrado ke envezes bushkan a kaji dezapareser entre los varyos sitizanos del payis ande se topan, no parvyenen nunka a realizar enteramente sus objetivo.
De mezmo, se puede afirmar ke mizmo en una verdadera asimilasyon de sus parte, eya no es nunka immedyatamente absoluta i ke kale tres o kuatro jenerasyones asta ke la famiya de un konvertido parvenga a pedrerse realmente en la multitud de sus muevos ermanos.
Esto dicho, una koza es reelmente muy sorprendyente en el livro entitolado Refleksyones sovre la kestyon djudia: ‘la desgrasya de la Shoah no es kaji nunka mensyonada’. Deke?
Segun uno de sus komentadores, dospues la fin de la segunda gerra mundyal, Jean Paul Sartre no medito a ningun momento sovre la inkontestavle trajedia del puevlo djudyo. El, a esta epoka, no konosia ni la Istorya Djudia ni su grande i profunda Kultura.
A kontinuar la semana ke vyene konsernando la influensa de Benny Levy sovre Sartre.
