Fiestimos kon orgolyo i alegriya el 160en aniversario de mi eskola Notre Dame de Sion

Esti SAUL Judeo-Espanyol
30 Kasım 2016 Çarşamba

La letra de la invitasion eskrita por SUZAN SEVGİ, Directrice Adjointe:

Apresiados N.D.S.,

La data 27 novembre, 1856, es la data ke fue avierta en muestro payis el primer liseo para ijas, en Pangaltı, İstanbul.

Vamos a fiestar, kon la partisipasion de los invitados, las soeures de Notre Dame de Sion de Roma, de Fransia, los invitados, Profesores, elevas ansianas, parientes de elevos i elevos.

En este dia vamos a konoser las personas ke penaron por muestra eskola i en partikular la renomada SOEUR EMMANUELLE (1908-2008), sus lavoros apresiados en Ejipto, i SOEUR MARIE FRANÇOIS LIN (Artista pintora).

Vos invitamos al program:

15:30 - Esra Kocaoğlu, Fleurichamps (88), una “eau de parfum” preparada por eya mizmo (Eau de Parfum N.D.S.1856).

16:30 - Spektakolo muzikal i literario interpretado por MARIE CHRISTINE BARRAULT, FRANCK CIUP (piano):

SOEUR EMMANUELLE: De Notre Dame de Sion, Istanbul, aux chiffoniers du Caire (Desde Notre Dame de Sion, Istanbul, asta los handrajeros de Cairo).

Vernisaje de la ekspozision “Itinéraire en Peinture” por la SOEUR MARIE FRANÇOIS LIN (Taiwaneza de N.D.S., Evry-Grandbourg).

Sueto fiestar este dia de orgolyo djunto kon vuestra presensia en muestra eskola, Notre Dame de Sion, el 26 novembre, 2016.

Kon amor i respekto:

SUZAN SEVGİ (85)

***

Presentes en este diya maraviyozo inolvidavle, tuve el plazer de konversar kon las soeures ke onoraron Notre Dame de Sion.

Soeur Adriana CASTRO (Representante del Konsilyo Jeneral de las Soeures de N.D.S en ROMA.

Soeur Jackie CHENARD (Representante de las Soeures de la Provence de Mediterranée.

Soeur Monique HARISBOURE (Representante en Turkiya).

Los suvenires ansianos, nostaljikos, no se pueden olvidar, mizmo de antes 40 anyos...

Es posivle de olvidar los esforsos de los profesores ke mos ensenyaron tambien: “LE BIEN ET LE MAL”?

No manko de ser presente kada anyo por la fiesta de 20 Janvier.

Es de no mankar tambien los konsertos (non pagados) en los salones del Liseo.

No me olvido tambien mi emosion kuando me demandaron de azer una ekspozision de pintura personal, i konferensias preparadas en fransez, kon sujetos konsernando los artistos Fransezes, Leopold Levy i Camille Pissarro.

Tengo el plazer de suetar, a Notre Dame de Sion la kontinuasion de su egzistensia kon sukseso...

Rengrasio kalorozamente:

YANN DE LANSALUD, Directeur,

SUZAN SEVGİ, Direktrice Adjointe de Notre Dame De Sion.