Esta semana, frankamente no estava topando kualo eskrivir. Tuve echos ke me kansaron i un poko konfuza, devo atorgar ke teniya el meoyo vaziyo. Entre mis preokupasyones importantes, reelmente ke me peryi. Komo ya eskrivi bastante sovre rekuerdos, sovre la meteorolojiya ets. esta semana no kero repetarme. Afilu pensi de avlar kon mi editora i demandarle si es posivle de no dar un artikolo esta semana. Ma, espero ke no va aver menester.
Komo lo digo syempre, el azardo vino otruna vez a vijitarme i ayudarme!. Ke manera? En la manera de una edisyon de muestro jurnal, del ŞALOM del anyo (2009), ke guadri tanto tyempo. Puede ser lo ke va azer es una manera de oportunismo. Los lektores van a desidar si es ansi o no... O puede ser es un sinyo de “deformasyon profesyonal” komo lo tiene dicho la Sra Gila Benmayor en uno de sus tekstos en el sovredicho jurnal. Eya, en kada viyaje ke aze a un pais, ve las kozas i las personas, kon el instinkto de una jurnalista. I muy probavle kon la esperansa de azer un artikolo, lo ke es muy normal.
Azyendo ansi no puede profitar anchamente ni de la ermozura de akel momento ni del derredor. El faktor ke la rende diferente de los otros turistos, deve ser asigun eya “la deformasyon profesyonal”. Keridos lektores, Gila Benmayor es una pura profesyonala. Komparandame kon la Sra. Benmayor, yo so una debutante malgrado mi edad. Meldo (a la okazyon) sus tekstos. Absolutamente no kero kompararme a eya. Ma, devo apuntar ke ansi ago i yo munchas vezes. Me entereso (o devo dizir me enteresava!) a mi entorno, a las personas kon el buto de observasyon.
Yo me enfluenso muy frekuente de lo ke veygo, meldo o syento. Alora, kualo de mas natural ke de transferar estas impresyones, sentimientos o informasyones a una pajina, egzaktamente komo esto azyendo en este momento? Ma, keridos amigos, este jurnal del anyo 2009 fue komo una fuente para mi. Ay entre sus pajinas dos, tres koensidensas, komo ke diga?... ke me enkantaron i las asimili un poko kon mi propyo.
Kontinuando de la mizma gazeta del 2009, kon el kanton de muestra amiga Ester Yannier. Ay una koza muy sinyifikante ke kero tresladar... “El kazal entero sale a la orasyon de luvya. Ma, solo una persona tiene una ombrella EN LA MANO. “Esto es KREENSA”.
El padre va echando su bebe al aver, lo va saltando. La kriatura, kontente, esta echando tarakas sin espanto de kayerse. Esto es “KONFIENSA”. El benadam se echa a la kama sin dinguna garansiya de amaneser sano i rezyo. Portanto, antes de durmir aze planos para el diya ke va vinir. Esto es “ESPERANSA”... Kon estos tres, la vida es ermoza. Si, keridos amigos, la vida es ermoza i yo syempre tuve kreensa, konfiensa i esperansa en eya. Este paragrafo merese de ser meditado...
Reushi a azer este teksto grasyas a las damas ke nombri i ke fueron mis “fadas de inspirasyon”. Es koraje o oportunismo?.. Al lektor de desidar.
I por terminar, una fraza de Violet Alaluf (p.5) “Eskojed un buto. Es ke reelmente lo keresh alkansar? Ke obstakolos tenesh delantre? La sola koza de azer es echar los pasos menesterozos. La vida ama los korajozos!...”
Keridos amigos, No puedo konoser vuestra idea sovre este artikolo ma tuve el koraje de azerlo… Semanada buena a todos los lektores...
