El aktual Governo İsraelyano (dirijido por Binyamin Netanyahu, Benet i varyos otros ministros ultra nasyonalistos o ultra relijyozos ke dezean la realizasyon del programa de kolonizasyon de una partida de las tyerras Sisjordanyanas) resivyo la nominasyon de Donald Trump a la kavesa de “Los Estados Unidos” kon grande alegria i fervor.
Por kontra en la Amerika del Norte, los djudyos estan muy perpleksos i mizmo muy anksyozos de las olas de ultra-nasyonalizmo i anti-imigrasyon ke pujan de mas a mas en el payis.
La situasyon en este momento esta muy kompleksa. Al pareser, personalmente Donald Trump no es realmente antisemito, ma munchos de sus elektores lo son. I es en este elektorato ke el muevo prezidente va fatalmente eskojer una grande parte de los myembros de su governo.
El muevo Prezidente tyene una ija konvertida al djudaizmo ortodokso, lo ke (al kontraryo de munchos otros padres ke se topan en la mizma situasyon) no lo pusho a renyegarla ni a dezeritarla.
Donald Trump estima muncho su yerno ke es de desendensya ebraika i muy relijyozo, al kual munchas vezes el demanda su opinyon sovre varyos problemas difisiles a rezolver, lo ke inkontestavlemente es un grande sinyo de konfiansa i mizmo de apresyasyon.
Ma, a la diferensya de nombrozos otros Prezidentes republikanos o demokratos, esta vez la mayoria del puevlo amerikano eskojo komo Shefe Supremo del payis, un kandidato kaji totalmente ineksperimentado en el espasyo de la politika i ke nunka tuvo la okazyon de okupar kualkyera funksyon en otros governos anteryores.
Donald Trump es sin dubyo un selebre Ombre de Negosyo muy performante i de una rikeza fabuloza; el es un grande konstruktor, puede ser el mas selebre konstruktor de edifisyos enormes i muy luksyozos, ma en ningun kavzo (tal ke lo vimos en su kampanya elektoral) el no es un Ombre de Estado.
Desgrasyadamente, esta falta de eksperyensa lo pusho a eskojer komo konsejero ‘Stephen Bannon’ el kual es al pareser un grande antisemito entornado syempre de kolavoradores ke partajan sus opinyones negativas dirijidas kontra kualkyera persona de opinyon diferente.
A este propozito, en una konferensya de la anti-diffamation league (ADL) sovre el antisemitizmo, “Yonatan Greenblat” ke es el direktor de la dicha organizasyon en los Estados Unidos, deklaro ke el odyo kontra los djudyos en su payis se topa (en este momento) en el nivel de virulensya el mas alto desde el anyo 1930.
El afirmo ke koryentes politikos de los partidos ekstremistos de la Derecha provokaron una bruska reaparisyon del anti-djudaizmo, asta mizmo akulpar Israel de perpetrar un Jenosidyo en Palestina.
Tambien Yonatan Greenblat mensyono en todos sus detalyos la inkyetud de los djudyos kuando Stephen Bannon fue nominado “shefe de la estratejia de la Kaza Blanka”.
Stephen Bannon era el prezidente de Breitbart Net, el kual es un Sityo Internet kualifikado de tener una vizivle voluntad de syempre renforsar el partido Republikano en sus myembros ekstremistos, todos (komo fue dicho mas arriva) absolutamente refraktaryos a kualkyera imigrasyon de sitizanos estranjeros.
De mezmo, a este mizmo sujeto, vengo tambyen de meldar un artikolo entitulado ‘Kualas perspektivas despues la eleksyon de Donald Trump?’ sinyado de parte de David Chemla ke es el sekretaryo Jeneral de la Asosyasyon Jcall, la kuala es kompuesta de myembros del djudaismo liberal Evropeo ansi ke de los amigos del Estado Israelyano en su bushkida de la Paz kon los palestinyanos.
David Chemla mos dize ke paralelmente a los djudyos Amerikanos, los djudyos Evropeos tambyen dezeavan ver a la kavesa de la mas grande Potensya mundyal, una “Hillary Clinton” la kuala (aun los varyos yerros de su pasado) tyene personalmente la eksperyensa nesesarya al posto Prezidensyal, i kon la kuala ay la posibilidad de diskutir de una manera mas o menos rasyonal.
Estos ultimos tyempos, todo komo los djudyos laikos de New York, Washington o Kalifornia, ets… los djudyos laikos de Evropa tambyen se topan munchas vezes delantre el menospresyo de los partidos politikos kristyanos ultra nasyonalistos, lo ke los pusha a demandarsen kon inkyetud de ke manera sus propyo payis sera governado en los tyempos a venir.
No mos olvidaremos ke (de ke parte del Oseano Atlantiko ke sea) malgrado todo lo ke los diferensya los unos de los otros, los djudyos tyenen munchas vezes la mizma manera de vizualizar el futuro i de rezolver los problemas muy intrafikados ke eyos enkontran sovre sus kamino.
Es ke realmente Donald Trump es un peligro para los djudyos de los Estados Unidos? Esto, los dias a venir mo lo diran.
