Limmud 2016 “Lehayim”

Limmud es un festival de kultura ke se organizo en 13.11.2016 en la eskola djudiya ‘Ulus Musevi Lisesi’ en Estambol. Es el dodjen anyo ke se esta organizando en una manera perfekta; en reushendo a trayer personas, profesores de grande valor, emportantes en sus espasyos i dando la emportansa menesteroza a todos los detalyos.

Şeli GAON Judeo-Espanyol
16 Kasım 2016 Çarşamba

Limmud es un festival de kultura ke se organizo en 13.11.2016 en la eskola djudiya ‘Ulus Musevi Lisesi’ en Estambol. Es el dodjen anyo ke se esta organizando en una manera perfekta; en reushendo a trayer personas, profesores de grande valor, emportantes en sus espasyos i dando la emportansa menesteroza a todos los detalyos.

La sinyifikasyon de Limmud es ambezar, estudyar.

El buto es ambezar kon la partisipasyon de la persona i dar la okazyon de developar muestra identitad.

Limmud ambeza a los partisipantes a partajar la konosensya, sin asperar nada del den frente.

Developa la identidad djudiya i arezya (güçlendirmek) la kultura. Es una kolektivitad de estudyo.

Alhad demanyana la primera konferensya ke asistimos kon mi amiga fue la de Ivo Molinas kon el sujeto enteresante ke era: “Friederich Nietzche: Es Antisemito o es Filosemito?”

Ivo Molinas es el shefe de redaksyon (genel yayın yönetmeni) del jurnal Şalom i en mizmo tyempo eskrivano en este jurnal. Nietzche era un pensador (düşünür) ke dyo grande danyo a la komunidad djudiya. De sesh anyos en delantre, el ampeso a preguntar (sorgulamak) los males (kötülük) del mundo. Era una persona muy entelijente ke se izo profesor de filolojiya kuando teniya ventisinko anyos.

Su razon de bivir fue: “Bivir Pozitivamente”. Bivir de una manera alegre i entusiasta (coşkulu).

Nietzche fue un filozofo syempre oryantado a las personas (insana odaklı). El se influenso del antisemitizmo porke se engrandesyo fina los anyos 1960 kon la ideolojiya nazi.

Los djudyos eran para el: el puevlo eskojido. Despues de ser antisemito fue filosemito… ets.”

La sigunda konferensya enteresante de un ombre muy reushido en la vida profesyonal, proprietaryo de un holding. El dirijente de una sosyetad ke tyene 5.500 lavorantes.

“Durmuş Döven” es la 68en persona ke vido el Mundo del Espasyo (uzaydan dünyayı gören) syendo piloto el mizmo.

Ay 24 anyos ke esta utilizando (kullanmak) su avion propyo. Esta utilizando un avion de 14 personas komo amator.

En su manseves, era de la partida politika syedra, despues se izo kapitalisto i agora es tradisyonalisto. Konto ke se konosyo kon Putin i munchos kaminos para la reushidad…

Despues del komer de midi era la ora del djudeo-espanyol. Tres dammas savrozas, sangrudas i muy sempatikas. Anna Eskenazi, Suzet Herman i Dora Niyego.

El sujeto de este anyo fue yeno de amor i umor. “Las Madres Saven Todo.”

Anna Eskenazi, ampeso a avlar en dizyendo ke: “Tomar parte en el Limud es una delisia. La preparasyon de los tekstos, sentir la eksitasyon de la prezantasyon es un sentimyento uniko.

Los sintimyentos de ermandad ke se adjustan, es la okazyon de muevas amistades sinseras.

La madre Djudia es kudyoza, kerensyoza, pasensyoza, kapachi i muy devuada. La Misyon de las Madres kontinua i despues de kazar a los ijos. Kuando se fuyo la mosa, asta ke se va topar la mueva, al momento el telefon de los ijos sona komo alarma numero uno, komo en la Armada…

…Ya asperimos ser Gran-mama anyos i panyos… Ya no mos kedo fuersa para koryer i yevar en los brasos a los inyetos…

Agora pasan una medya vida para konosersen… Ke kimika (kimya) ke no se adjusta i ke elektrisidad ke no se asyende…

Ser Madre es un arte supremo. Madre mashka fyerro…

Bendichas Madres, ke tengan vida larga i syempre ke bivan, las mas orozas ke posible”…

Suzet Herman es un pozo sin dip, yeno de anekdotas, ke todos los evenementos, pasajes ke le afita kaji todos los diyas, kon su  Madre Kerida…

Su Mama, la dulse, la fuerte, la sempatika, la diktatora, la kerensyoza, la pasensyoza, la kapachi, la filozofa, la ke tapa faltas i la ke dirija todo kon sensya, kere dizir ke tyene todas las kalidades de Buena Madre Djudia.

Suzet kon su memorya infalible empeso a avlar en akodrandose de los rekuerdos de su manseves i los enveranos ke pasava kon felisidad en la isla Büyükada.

 “Lo ke teniya 10 anyos, ke me akodro komo oy, ke ir a Buyukada era para mi obtener la libertad. Porke saliya demanyana, entrava la noche antes de mi padre.

Enfrente teniya una vizina grega ke se yamava Likericha.

Le diziya ven djugaremos sek sek, eya demandava permisyon a su madre i su madre no la deshava nunka. Un dia Likericha kijo djugar kon mi, i yo para vengarme le dishe: mi madre no me esta permetyendo. Eya kon los mokos enkolgados se fue a su kaza. Yo me estava sintyendo muy oroza de pueder pagarle de la mizma manera…

Dora Niyego, la eskrivana del Şalom, savida, profesora de ingles i del ladino, aparejo un teksto spiritual por las madres. Unos rekuerdos de su madre, de su granmama i los evenementos kon su famiya enteresantes i muy sempatikos.

“Mi madre aziya lo ke oyo de su madre.” “A kriyaturas, no se da kafe”. Deke no? Porke si beven kafe, pishan preto!... Barminan ke espanto! El Dio ke no mos trayga!....

Ah, los piezes. Muy emportante para la salud. No savesh, ke la yelor entra al puerpo de los piezes? Por esto, mi madre me dizia, ke no kamine deskalsa mizmo en kaza. “Te vas a yelar” me diziya mizmo si estava kalor. Metete pantuflas, para ke no te agas hazina!...

No mos olvidaremos del estomago. Kuando me echava a la kama, mezmo para repozarme, deviya de kuvijarme el estomago… Kuando me aziya hazina, seguramente, la mijor melizina era el “Raki”. Dolor de kavesa? Un algodon de raki a la kavesa…

“Esta mujer te esta alavando muncho, ya la konosko, tiene ojo pezgado” diziya mi madre, “ayde araskate el popo, i metete un pedasiko de ajo a la aldikera, para ke no te toke el ojo malo”… Doreta, la madre de mi padre, ke me dyo su nombre biviya kon mozotros, i era muestra segunda madre. La yamavamos Mamika.  Mamika era muy espantoza.

Un dia se suvieron al taksi kon mi madre i se estan indo al Bosfor a komer peshkado. El shofor esta konduizando komo un loko. Mamika ya se va azer enriva del espanto. Enduna el shofor se estuvo delantre de una estasyon para tomar benzin.

Mamika, mas no se pudo detenerse: “Bu ki benzinin yoktu, bu kadar hızlı gidiyordun, şimdi ki benzin aldın, uçacaksın herhalde…”

Fue un dia reushido yeno de saverisyo, yeno de konosensya sovre diversos sujetos uno mas enteresante de otro. Todos koryendo de una konferensya a la otra para pueder suivar. No se kere dicho por los tratamentos, dulsuryas, salados, frutas i bevyentas todo kon abondansa.

El komer de midi i de la noche kompleto el dia.

Para pueder realizar este dia munchas volontaryas i volontaryos lavoraron de alma i korason. Muestra komunidad esta azyendo todo el posivle para sus korelijyonaryos.

Kero remersyar a todos los ke lavoraron i a todos ke akseptaron de asistir a este dia fabulozo.