Myerkoles de la semana pasada, para munchos de entre mozotros fue una muy amarga sorpreza de meldar en la prensa mundyal o de oyir en la televizyon ke Donald Trump versus Hillary Clinton, avia sido elijido prezidente del payis inkontestavlemente el mas adelantado del mundo, kon sus nombrozas universidades de alto nivel i sus sentros syentifikos ke son aktualmente verdaderos manaderos de muevas deskuvyertas munchas vezes benefikas para el resto de la umanidad.
Aun ijos de un puevlo ke al orijen era kompuesto de myembros venidos de payizes diferentes, los Grandes Ombres de los varyos Estados Unidos supyeron krear una Potensya superyor ke munchas vezes oy en dia desida del destino del mundo en su totalidad.
Ocho anyos antes, la mayoria del puevlo amerikano avia triunfado de su prejuisyo rasyal i avia dado sus votos a un kandidato de kuero muy bruno, konfirmando ansi la madurez de espirito de sus myembros en su lucha kontra el fanatizmo de varyos otros blankos en direksyon de los pretos, los kualos son venidos del fundo de la Afrika.
En la ultima eleksyon Amerikana, se asperava ver la realizasyon de un programa ainda mas demokratiko i su viktorya kontra un otro prejuisyo dirijido esta vez kontra el elemento feminino.
Martes el ocho del mez koryente fue lo kontraryo ke se realizo. Son los ultra nasyonalistos ke triunfaron kon un dezeo persistyente de afirmar sus superyoridad nasyonal..
“Make America Great Again” fue el grito ultra gloryozo de Donald Trump i de de la mayoria de los ke votaron en su favor.
Kuala es la razon de este dezeo de ‘afirmasyon fanatika de si mizmo’ versus ‘el sentimyento de solidaridad umana’ ke avia sido el rezultado de las dos presedentes eleksyones del puevlo amerikano?
Unos de los elementos de baza de los varyos diskorsos elektorales de Donal Trump fueron de konstruir una pared entre los Estados Unidos i el Meksiko afin de meter fin a kualkyer migrasyon klandestina i tambyen de ekspulsar a lo menos 3 milyones de emigrantes, no en sigida de una kulpa, ma porke estan en el payis desde unos kuantos anyos sin kualkyer dokumento nesesaryo.
La prensa kaji en su totalidad mos ambeza ke el multimilyardero empesara sus modifikasyons kon prestor durante los primeros 100 dias despues su nominasyon afin de kumplir un grande trokamyento en la presedente politika del payis.
Segun lo ke meldi en la gazeta Franseza Le Nouvel Observateur: “Estos Syen primeros dias de la administrasyon Trump seran markados de una voluntad obsesiva de destruksyon de todas las reformas realizadas por su predesesor”.
A notar ke el ya avia avlado en detalyo sovre todo lo ke dezea trokar, en su diskorso elektoral del 22 Oktobre del anyo koryente, en Pensilvania, lugar istoriko de ‘la Gerra de Sesesyon’ i del selebre diskorso del Prezidente Abraham Lincoln en data del anyo 1863.
I komo syempre, una kestyon mos vyene al tino i mos demandamos: “Es ke se trata de parte del muevo prezidente de la simple afirmasyon de su opinyon?” O byen “Es ke el muevo Prezidente kere realmente destruir el ansyano?
Devemos por seguro akseptar ke el fakto de “una migrasyon sin kontrol permanente” puede permeter no solo a los reales menesterozos de refujyarsen en un payis ande puedran bivir sin kualkyer espanto, ma tambyen a los verdadores enemigos de los kualos el uniko objetivo es de destruir.
A notar de muevo ke syempre segun lo ke meldi en la prensa, la mas parte de los elektores de Donald Trump fueron blankos ekstremistos en sus ultra nasyonalizmo, entre los kualos munchos mankan de una real kultura filozofika o syentifika ansi ke de madurez de espirito.
Por kontra, el programa del futuro governo parese ser muy ancho i largo, riko de varyas opinyones sovre los problemas ke aktualmente okupan el espirito de munchos de entre mozotros sin por esto pueder ayegar a una verdadera solusyon.
Tuve personalmente el dezeo de konsultar a este sujeto el Sityo elektroniko Wikipedya, el kual es bastante atentivo a komunikarmos novedades ke son realmente autentikas, lo ke me pusha a konsejar a mis lektores de azer lo mezmo afin de topar munchos otros detalyos ke no tengo la posivilidad de darvos en mi relativamente kurto artikolo.
