Kada demanyana kuando kon prisa meldamos varyas gazetas del dia, no es raro de enkontrar informasyones sovre sujetos enteramente diferentes ma ke paresen munchas vezes desmentirsen las unas las otras.
Envezes akontese tambyen ke la prezensya sovre una mizma pajina de dos faktos sin ninguna relasyon entre eyos, formen un enorme paradokso en sus simple enkontro.
Keridos lektores, ya so konsyente ke estos dos primeros paragrafos de mi artikolo no son muy komprensivles; me ekskuzo de no pueder formular de una manera mas klara lo ke reelmente dezeo ekspresar, ma puede ser mas leshos la koza sera posivle.
Los dos faktos de los kualos se trata, son los sigyentes:
A) Myerkoles pasado, el 2 del mez koryente, meldi en el sityo elektroniko nombrado “The Times of Israel Français” ke nombrozas mujeres Israelyanas entre las kualas unas kuantas tenian un Sefertora en los brasos, kaminavan en direksyon del lugar ke les avia sido akordado en un espasyo delantre el Kotel Maravi, kuando eyas fueron arrestadas por un grupo de djudyos fanatikos, los kualos gritavan ke las mujeres no tyenen el derecho de tener en sus brasos estos grandes Simbolos del Djudaizmo.
Ansi, imposivle de no demandarmos: de ke derecho impedir madres djudias ke son las guardyanas de la Ley ke mos konfio Dyo, de tener en sus brasos (salvo syertos dias) objektos sakros? Ninguna mensyon es echa a este sujeto en el Dekalago ke es la baza selesta de muestra Kreensya.
La fidelidad al Djudaizmo no es esta persistensya a no kerer akseptar kualkyer adelantamyento en los tekstos Talmudikos kuando al entorno de kada uno de entre mozotros todo esta en estado de evolusyon. Ay inkontestavlemente mas espiritualidad en el esforso personal de kualkyer djudyo de kerer mantener la etika de los “Dyes Komandamyentos” ke mos ordonan no solo de respektar al Dyo, ma tambyen muestros semblavles en sus bushkida de djustisya i de umanismo.
La relijyon djudia es antes de todo este presepto sublime ke mos dize “Ama tu proksimo komo ti mizmo”.
B) De otra parte, kaji a la mizma data i en el mizmo sityo elektroniko, un otro artikolo mos ambezo ke Myerkoles pasado, Reuven Rivling resivyo la vijita del Dr. Izzeldin Abuelaish, personaje palestinyano ke kijo prezentar sus omenajes al Prezidente Israelyano por sus esforsos en el objetivo de topar una solusyon a la regretavle desgradasyon de las relasyones entre los dos payizes vezinos.
Durante la muy pozitiva konversasyon ke eyos tuvyeron, el Dr. Izzeldin Abuelaish disho: Israelyanos i Palestinyanos son ermanos; fue dekretado por los Syelos ke devemos bivir lado kon lado en el futuro. Muestros destinos paresen ser entrelasados i ansi devemos krear pontes entre los dos puevlos. Kada uno de entre mozotros sufre del konflikto aktual, la vida es kurta i el tyempo es kontado.
Ken es el Dr. Izzeldin Abuelaish? Munchos de los lektores se akodraran del muy triste yerro ke avia involuntaryamente echo (ay de esto unos kuantos anyos) la armada israelyana durante la gerra kon el Hamas, kuando bombardeo un espasyo al bodre de la mar ande se topavan 4 adolesentes djugando a la balla… yerro ke kosto la vida a tres ermanikas palestinyanas i a sus primika la kuala fue la kuatrena viktima.
Desde ke se rendyo kuento de la triste realidad, la Armada Israelyana no avia ezitado a asumir immedyatamente su responsabilidad i a prezentar sus dolorozos regretos al enemigo.
El Dr. Izzeldin Abuelaish ke aktualmente bive kon el resto de su famiya en el Kanada era el padre de las tres ermanikas ke muryeron debasho el fuego Israelyano.
Ansi en esta emisyon del sityo elektroniko en kestyon, mos topimos delantre un paradokso muy sinyifikativo: De una parte - Una ultra-relijyozidad ke prohibe a las madres djudias de tener en sus brasos objektos sakros - i de otra vanda - El sublime Dezeo de Paz de un Palestinyano ke fue terrivlemente ferido en su sensibilidad de padre.
El paradokso del kual se avlo al empesijo de este artikolo es djustamente el rezumen de estos dos faktos kontraryos el uno al otro...
