Este artikolo, es una chika vizyon del Galata de mi chikez i el aktual. En el torno ke ize de la Kula a Karaköy, mis rekuerdos se arrebivyeron. Estas kalejas las konosko muy byen. Mi chikez i mi prima manseves pasaron aki, en este sentro de Galata. En primero vijiti Saffet Bey Apt., ande morimos munchos anyos i de ande sali novya. En este apartamento moro El Sr. Avram Leyon (b”m), fondador de muestro periodiko “ŞALOM”. Izimos buen vezindado kon el i su espoza, Mme. Sofi z”l.
En kontinuando, se puede salir a unas eskalerikas, djusto enfrente de la Sinagoga Ashkenazi de Yüksek Kaldırım…Bankalar Caddesi, Hacı Ali Sokak, O Felek Sokak…Kalejas ordinaryas para unos, ma, no para mi. Moravamos tambyen, muy serka de Felek Han, ande ivamos muncho, syendo ke una muy serkana muestra morava ayi…
Kon toda su esplendor, un apartamento de Kamondo: Felek Han, kon su nombre aktual, Galata Residence, Apart Hotel. Asta 1881, fue un edifisyo de tavla, transformado en apartamento, por un arkitekto de la epoka: Gabriel Tedeschi. Fue alkilado por la “Alliance Israelite Universelle,” kon el eskopo de fondar una eskola. Ma, despues, el edifisyo fue empleado en el domeno komersyal. En los anyos 1940, ke yo lo konosi, era de muevo un apartamento ande moravan munchas famiyas Djudias. Efektivamente, Galata, sentro vyejo komo la istorya de Estambol, syendo un porto, fue syempre un pasaje entre el Oriente i el Oksidente. Por esta razon, fue tambyen, el sentro de los movimyentos ekonomikos i komersyales de todos los tyempos. Aryento de esta formasyon, los de Kamondo, fueron los mas renomados de los bankyeres sentralizados en Galata. En la epoka de sus esplendor, fueron mezmo, komparados a los grande bankyeres Evropeos, komo Rothschild, Hirsch, ets…
Felek Han, uno de sus nombrozos imobles de Galata, ansi ke las manyifikas Eskaleras de Kamondo, son la erensya, ke la famiya desho en este sentro. Ay un rumor dizyendo ke las eskaleras, fueron konstruidas para fasilitar el ir i vinir de la famiya, al nasimyento de Mois Kamondo, 1860-1935) de la sinkena jenerasyon de los de Kamondo, ke pozaron sus kashe a la perioda kaji final del Imperiyo Otomano.
Estas eskaleras famozas de Galata, son tambyen, unos de los kaminos para ir al sovredicho edifisyo: Felek Han. Eskapando de suvirlas, la sigunda kaleja a la derecha es Felek Sokak. En el empesijo de esta kalejika, syempre a la derecha, se topa el SCHNEIDERTEMPEL, ke fue una sinagoga, fina 1960, una de las tres Kehilot ke fondaron los Ashkenazim de Galata. Esta keila, al orijen Beth a Keneseth Tofre Begadim, fue fondada en 1894, por la Unyon Ashkenazi de Shastres. Ma, yo syempre, desde mi chikes, la konosi komo El Kal de los Edirnelis! No se la razon, ma, ansi la nombravan mi avuelo i mi padre, ke teniyan el uzo de irsen ayi, syendo ke moravamos en el mezmo sentro de Galata.
Serka la fin de mi torno, abashi de las eskaleras de Kamondo, i me fui direktamente a un edifisyo ke se yamava Kal Kadosh de Galata, ma, ke todos lo konosimos tal ke el Kal de Zülfaris. Asta 1983, munchas bodas se selebraron ayi, i entre eyas, mi kazamyento, en Septembre 1951. Reelmente, un vyejo rekuerdo nostaljiko, ma, nunka olvidavle. Este edifisyo fue por un largo tyempo Muzeo Djudyo de Turkiya.
En el Mayo del 2004, la Direksyon del Muzeo organizo un diya de nostaljiya. Partisipimos i mozotros tambyen a este viaje al muestro pasado, porke mos arrekojimos ayi munchas personas ke mos aviyamos kazado en este Kal. Fue una buena okazyon de arrefreskar muestros rekuerdos, komo ize yo agora en este torno a Galata.
