No me demando lo ke puedo devenir, ma lo ke puedo azer; es la razon por la kuala prefero mas servir ke dirijir – Shimon Peres
Israel en dolyo de Shimon Peres, uno de sus Padres Fundadores i uno de sus vyejos dirijentes kaji syempre tornado en direksyon de un objetivo de armonia entre los umanos de kual orijen ke eyos sean, Premyo Nobel de la Paz kon Moshe Rabbin i Yaser Arafat en el anyo 1994.
Si, Israel i tambyen el puevlo djudyo kaji en su totalidad, pedrieron un grande Ombre de valor, luchador persistente por la djustisya i la igualidad, el kual a ningun momento traizo su ‘ideal de solidaridad’ al pareser malorozamente muy difisil a realizar.
Komo previsto, sus funerales fueron grandiozos, prezidentes i prestijyozas personalidades de las mas grandes potensyas mundyales estavan prezentes, por empesar (si no me yerro) el Papa François, kapo espiritual de la kreensa Kristyana, Mohamed Abbas, prezidente de la Kolektividad Palestinyana, Barak Obama i Bill Clinton prezidente i ex-prezidente de los Estados Unidos, François Hollande i Sarkozy de Fransya, el ijo de la Reyna de Ingleterra, el Rey de Espanya, Angela Merkel de Almanya i byen byen otros.
Munchos de entre eyos tomaron la palavra para azer el elojyo del defundo i meter en evidensya sus esforsos para ke enfin reyne la paz sovre tyerras aktualmente en estado de perpetual litijyo.
Por kontra, partikularmente estas ultimas desenias, Shimon Peres fue muy despresyado de parte de munchos de sus propyos korelijyonaryos Israelyanos, enfohados eyos en un ultra nasyonalizmo o un hasidizmo eksesivo, los kualos reklaman una governansa severa al detrimonyo de kualkyera prezensya palestinyana sovre tyerras paradoksalmente de Sisjordania.
En el mundo obskuro i kaotiko ande mos topamos i ande los ombres i mujeres (ke son kriansas pensantes) pyedreron el senso de lo ke es la Verdad i la Djustisya, “Shimon Peres”, persona de sehel i de grande sensivilidad, tuvo kaji syempre el respekto de los derechos no solo de sus korelijyonaryos ma tambyen de los otros, kuala fuera sus kreensa.
Esto dicho, una kestyon vino al tino de munchos komentadores politikos profesyonales ke analizaron las reaksyones de varyos Estados muzulmanos, los kualos desde un syerto tyempo se topan en kontakto mas o menos frekuente kon Israel, ma ke se kontentaron de mandar un deputado o un embasador al funeral del Ombre ke defendyo lo mas los derechos del puevlo palestinyano.
Deke en desparte de Mahmud Abbas ke tomo la palavra para azer el elojyo del defundo Shimon Peres, esta absensya de mensajes de apresyasyon de parte de otros payizes musulmanos, tal el Ayifto i la Transjordania ke fueron reprezentados simplemente por myembros de sus Governo?
A la eksepsyon de raros kavzos ande el no pudo intervenir afin de no meter en peligro su propyo puevlo (lo ke es byen komprensivle) Shimon Peres fue kaji syempre muy apresyado de parte de la mayoria de payizes ajenos, por su umanizmo i sus esforsos personales de paz.
Oy en dia, la prensa internasyonal mos ambeza kon amargura ke segun estos mizmos komentadores politikos, el governo Israelyano prezidado por Binyamin Natanyahu se topa (por kavza de su kompozisyon mas o menos ekstremista) en una situasyon ke no le permete de pueder tomar kualkyer desizyon realmente rasyonal diktada por la djustisya, lo ke probavlemente empidyo munchos kapos de Potensyas Muzulmanas de ser personalmente prezentes a los funerales del grande Ombre de Estado Djudyo.
Ke la alma de Shimon Peres repoze syempre en Paz en este espasyo de djustisya ke fue syempre su objetivo prinsipal.
