Revinyendo al ultimo paragrafo de mi artikolo de dos semanas antes, en el kual esta eskrito ke el selebre komentador Simon Veille dize ke la relasyon de Albert Einstein kon el djudaismo era laika i antirelijyoza, oy vos kero transmeter en el prezente teksto, lo mas posivle de refleksyones i aktos del Grande Syentifiko, los kualos mos ambezan muncho sovre su personalidad.
Al pareser, segun Einstein: el Djudaizmo reprezenta un asemblaje de tradisyones i preseptos kaji syempre de alto nivel moral, ma no una relijyon.
Para el, el Djudaizmo es una entidad kultural ke deve enfloreserse en “las syensyas i la saviduria” konsernando syempre “la Djustisya”, “la Paz” i “la Solidaridad umana”.
En uno de sus tekstos publikados en 1930, Albert Einstein eskrivyo ke egziste tres djeneros de djudaismo: el primer, ‘kompuesto del espanto i de la inkomprensyon de los fenomenos naturales’. El segundo, ‘ke es sosyal i moral’. El treser, ‘bazado sovre la kontemplasyon de la perfekta estruktura del Universo’.
I kuando un dia el Rabino Rav Goldstein le demando si el kreye en Dyo, el grande syentifiko respondyo “kreyo en el Dyo de Spinoza, el kual se manifesta en el orden armonyozo de la kreasyon del mundo, ma no en un Dyo ke se preokupa del destino i de las aksyones de kada uno de los umanos”.
Ansi (mos repeta Simon Veille) para el grande savyo, “el Djudaizmo” es una relijyon ke no nesesita la prezensya de Dyo, ‘El’ es una Etika ke avre sus alas sovre el respekto sakro de la vida.
A notar ke Albert Einstein nunka penso a un kualkyer raporto entre: de una vanda “las tradisyones i valores superyores de la kultura ebraika” i de la otra parte “la Transendensya de Dyo”.
Revinyendo a muestros leshanos avuelos, ombres i mujeres sin tyerra propya ke durante 2000 anyos bivyeron en estado de instabilidad permanente, es este mizmo patrimonyo kultural djudyo “echo de tradisyones ansi ke de un kodigo moral imperativo, komo tambyen de un indefektivle respekto de la Vida” ke ayudo munchos de muestros padres a evitar una integrasyon a kualkyer otra relijyon, i ansi aseguro la perenidad de muestro puevlo.
Se puede mizmo pensar ke antes milenaryos de anyos, kuando Adonay kreo el ombre, ‘El’ le ofresyo (en mizmo tyempo ke la posibilidad de avlar i komunikar kon sus semblavles) el libre arbitro i ansi la responsabilidad absoluta de sus aktos i palavras.
La pozisyon de Albert Einstein konsernando el Sionizmo evoluo kon el tyempo i los evenementos. Despues de la primera gerra mundyal ande el ultranasyonalizmo i el antisemitizmo se intensifikaron de mas a mas en Almanya, el grande ombre de syensya sintyo de una manera urjente la nesesidad absoluta de toparse en una atmosfera mas klara i ansi, aun ke al empesijo el se mostro retisente delantre varyos movimyentos sionistos ke dezeavan profitar de su nombre i de su notaryedad para defender sus proyektos, el aksepto de ayudarlos.
En 1920, Haim Weisman le demando de akompanyarlo en su viaje a los Estados Unidos para rekojer fondos en favor de los djudyos instalados en tyerras de Sion, lo ke Einstein aksepto immedyatamente, i mizmo ‘sovre su kamino de retorno’ el kijo vijitar la Palestina i partisipar a la kreasyon de la Universidad Ebraika de Yerushalayim, la kuala reprezenta no solo para el puevlo djudyo ma tambyen para munchos otros, una valor kultural universal.
Einstein era Sionisto a su manera. Eternal sosyalisto i anti-militaristo, el syempre tuvo el dezeo de un refujyo permanente para el puevlo djudyo, ande todo devia ser Paz i Solidaridad. El detestava el Irgun i nunka aksepto de azer la konosensya de Begin.
Despues la muerte de Haim Weissman, Ben Gurion propozo a Einstein de ser el segundo prezidente de Israel, lo ke el refuzo.
Esto dicho, no mos olvidaremos ke byen antes el anyo 1939, Albert Einstein se intereso partikularmente i de muy serka en todo modo de kestyon konsernando “el Sionismo” i “el antisemitismo” i es kon grande frekuensa ke el eskrivyo al sujeto de estos dos temas.
Komo ya fue dicho, i me ekskuzo de repetarme, segun el grande savyo, ‘el Djudaizmo es una valor kultural universal ke deve realizarse en la Etika’. “Un djudyo ke dezea empapar su esprito de umanizmo es un verdadero djudyo ke asegura una kontinual pujita de vida a su puevlo, el kual no merese de murir”.
Antes la terrivle segunda gerra mundyal, vyendo de leshos venir una posibilidad de aktos jenosidaryos kontra el djudaizmo en varyos payizes de Evropa, Einstein peno muncho a obtener de los Estados Unidos komo de otros payizes semejantes, ‘kotas de akolyo’ para los ke se topavan en estado de reziko de muerte, ma el rezultado no fue a ningun momento realmente pozitivo.
A notar ke la lucha intensiva de Einstein kontra las diskriminasyones rasyales fue kontinual i no solo kuando se tratava de sus korelijyonaryos, ma tambyen de kualker otros umanos feridos en sus derechos i dinyidad.
A kontinuar
