Kuantos mezes pasaron desde ke eskrivi por la Primavera? Komo se fueron?… Estamos bivyendo la fin del enverano, el mez de Septiembre. En Mayo, mos espertimos una demanyana, kon un sielo klaro, un sol briyando. Un poko otro va ser la kontra. Madrugadas freskas, demanyanadas mas oskuras. Alora, puedemos suetar la byenvenida al Otonyo.
Si keresh saver la verdad keridos amigos, deshad achetar, yo no puedo afilu konsever la idea ke esta sezon seya sinonimo de melankolia. Orozamente ke no es para todos. No kero egzajerar, de sorte ke me entravi de emplear el byervo “tristeza”. Un poko de ayre, un sielo eskuro i de vez en kuando una luvya no deven trokar muestra umor. Prefero a la kontra, pensar ke la sivdad se arrebive. Konsertos, ekspozisyones, okazyones de ver los amigos, ets… Naturalmente, los konsertos “en plein air” no mankaron este anyo, igual ke los anyos pasados. Bueno…
Estambol se esta aparejendo a bivir el mez de Septiembre i toda la prisa del empesijo de una sezon. Normalmente, la avyertura de las eskolas es lo mas importante para munchas famiyas. Esto se esta konstatando de munchas maneras. Antes de todo, el trafiko!… Ya empesimos a oyir de mas en mas klaksones, sinyo de la despasensya de los konduktores. Los kaminos serrados, muchidumbre asperando en los terminus i tambyen, los otobuses kargados… Estas son las vizyones abitualas de muestra sivdad.
Poko a poko las vitrinas estan trokando de facha i de produktos. Estamos vyendo trokamiento en syertas vedruras (legumbres). Ma, no se puede dezir ke ay muncha diferensya. Invyerno estamos topando kaji todos los legumbres de enverano, ke no syento el menester de enumerar! Al pareser ke el solo trokamiento ke vamos a ver en las vitrinas van a ser las vestimientas de sezon.
Otonyo, kon sus ayres i sus luvyas, las ojas amariyas o ruvyas, bolando sovre los trotuares, mesajeros infayivles de la sezon… i las luvyas ke mos van apanyar en supeto (esto ya lo bivimos i en Agosto!). En vezes, el sol va topar un pasaje entre las nuves, i un poko timido, mos va amostrar su kara para alegrarmos!… Miles de pasharos migrantes, se estan aparejando a abandonar la sivdad. El ritmo de la natura esta lavorando sin marearse, sin falta, komo una makina byen montada, una komputadora byen programada.
Portanto, Septiembre no es la fin del enverano. En el Sud de muestro pais se esta dayinda bivyendo el enverano, yeno, yeno. Es una grande oportunidad de vakansas para los ke no izyeron dayinda. Siguro si no tyenen algun impedimyento de lavoro urjente o eskolas… Oganyo, si no me yerro, no va aver de pensar a estos impedimientos. Porke ay la esperansa de 9 diyas de konje achakes del “Kurban Bayramı”.
Otonyo, Septiembre i tambien el mez de Tishri tyenen otras ermozuras, otras partikolaridades para mozotros Djudios. El mez de ELUL es el ultimo mez en el Kalendaryo Ebraiko. Es tambien dicho ser “Mez de Oportunidad”, konsiderado komo una peryoda de djuzgamiento, regretos i arrepentimientos. Es el mez de las fyestas, de selebrasyones, el empesijo de una mueva anyada.
