Komo puede ser ya lo meldariash, 300 rabinos profundamente ortodoksos de los Estados Unidos, Kanada, Australia, Israel, Fransya i varyos otros payizes, sinyaron una deklarasyon komun kondenando severamente los abuzos seksuales o fizikos perpetrados sovre ninyos ke se topan debasho la dominasyon de adultos mankos de konsyensya, por la mas parte: profesores o paryentes direktos mas o menos aedados, kontra los kualos es muy difisil para las chikas viktimas de luchar personalmente.
A este sujeto, los ke sinyaron la petisyon en kestyon demandan mizmo (se entyende byen, en kavzo de verdadera konviksyon de la verasidad de semejantes faktos) de denunsyarlos immedyatamente a las altas Autoridades Juridikas del payis, sin mizmo avizar los shefes de la Komunidad a la kuala eyos apartyenen.
Esta simple voluntad de parte de grandes autoritades relijyozas ortodoksas djudias de denunsyar i luchar kontra kualkyer akto illejitimo perpetrado de parte de algunos de los myembros de una komunidad a la kuala eyos apartyenen o no, parese ser un akto muy presyozo de evolusyon personal i tambyen un djenero de kritika direkta konsernando varyos arkaizmos ke, puede ser en el pasado, tenian una razon de ser, ma ke aktualmente devinyeron no solo kadukos, ma tambyen muy perikolozos i mizmo munchas vezes kriminales.
Muy raros eran los maestros del pasado ke no tenian el uzo de dar unos kuantos golpes no solo sovre las manos ma tambyen sovre la kavesa o otra parte sensivle del puerpo de los elevos rekalsitrantes, dadas ke riskavan munchas vezes de deshar enfermo el ninyo ke las resivian.
Konsernando la pedofilia, eya es komo un inmenso paradokso ke renyega el objektivo mizmo de la razon de egzistir de una sosyedad dedikada a la afirmasyon de la prezensya de Dyo. La pedofilia, en ke epoka i sirkunstansya ke sea, es un verdadero krimen impardonavle, perpetrado sovre un ser umano sin defensya i partikularmente dolorozo para la viktima ke se syente manchada por syempre en su puerpo komo tambyen en su espiritualidad.
La semana pasada tuve la kuryozidad de bushkar en mi ordenador la larga lista de lo ke yamamos “las mitsvot”. Munchas de entre eyas tyenen realmente una inmensa valor moral, otras son puede ser nesesaryas i validas en varyas sirkunstasyas… ma ay tambyen las ke son realmente kadukas i munchas vezes muy perikolozas.
Malorozamente egziste ainda en el djudaizmo relijyozo de muestros dias “komandamyentos” ke son en kavzo de aplikasyon kaji asasinos, tal ke es para una mujer suplisyada por un marido muy krual del kual kon razon se kere despartir, ma a la kuala el ombre refuza de dar el Get.
Ay de esto mas o menos 30 anyos, mis amigos de la Matan-Baseter i yo fuimos testigos de un fakto similar muy dolorozo. No me akodro si ya vo lo tengo kontado en el pasado, ansi (al risko de repetarme) vo de muevo revenir sovre el mizmo sujeto.
Los dias de distribusyon de paketos de komanya a los menesterozos de muestra komunidad, munchos jovenes deshavan sus lavoro personal para venir ayudarmos i entre eyos avia un manseviko i una mansevika amorozos el uno del otro ke (komo se dize en fransez) paresian nadar en la alegria, lo ke byen entendido mos azia grande plazer…
Ma un dia los vimos venir los ojos kolorados de yorar… Les demandimos la kavza de sus dezespero, el mansevo mos disho: “Venimos del grande Rabinato ande fuimos para espozarmos relijyozamente komo es de uzo antes la boda, ma el Haham en funksyon, kon muncha tristeza mos deklaro ke el no tenia el derecho de aunar una muchacha djudia kon un mamzer… El me disho ke so ‘un mamzer’ por la simple razon ke el primer marido de mi madre del kual eya kijo despartirse porke la azia muncho sufriir, refuzo de darle el Get.
Anyos i anyos pasaron despues del divorsyo sivil ke fue obtenido immedyatamente grasyas al testimonyo del vezindado, i un dia eya enkontro mi padre kon el kual se pudo kazar unikamente sivilmente”.
Deke derecho rebashar un mansevo yeno de aspirasyones umanitaryas i absolutamente inosente de kualkyer kulpa personal?
Oy en dia, el “Get” egziste syempre en la ley djudia, munchos djudyos de grande sehel i partikolarmente los myembros de una selebre ONG djudia kontinuan a luchar kontra este terrivle presepto ke no tyene ninguna valor si no de kastigar indjustamente los desendyentes de las desmazaladas mujeres ke no pudyeron obtener kualkyer rezultado a sus demanda de liberasyon.
