Avlando de Goya, Velazquez i El Greco

Ester i Rafael diskutieron el arte espanyol vijitando El Prado:

Esti SAUL Judeo-Espanyol
3 Ağustos 2016 Çarşamba

ESTER: Avias estado tu antes aki en El Prado?

RAFAEL: Esta es la sigunda vez ke vengo. Estuvimos viendo los kuadros de Goya. Ke te paresieron?

 

 

 

 

E.: De un realismo ekstraordinario.

R.: I yo la primera vez ke los vide no me agradaron, ma despues los entendi perfektamente.

E.: El ke mas me gusto fue el de los “Fusilamientos del 2 de Mayo”.

R.: Oy vamos a ver los de Velazquez. Ven, mira, este es uno de los kuadros mas famozos de Velazquez.

E.: I ken es este kavaliero?

R.: Es El Duke de Olivares, ministro de Felipe IV.

E.: Ke pintura mas diferente de la de Goya!

R.: Sin duda Velazquez fue el primer grande realisto de la pintura espanyola…

E.: Si, ma le falta la ironia, la satira i la pasion de Goya…

R.: Veyo ke asta agora el mas ke te plazio es Goya. Son dos pintores muy diferentes. La realidad de Goya en vezes es groteska.

E.: I penso ke la de Velazquez es serena.

R.: Tuvites en Toledo el plazer de vijitar la iglesia de Santo Tome i El Greco?

E.: Su kapolavoro “El Entierro del Conde de Orgaz”, me paresio ke estava en otro mundo.

R.: Si,el mundo del siglo 16... No se puede komparar. Velazquez i Goya son realistos, aser ke El Goya es mistiko.

E.: Aze anyos avia visto en Nueva York un kuadro de El Greco i me avia impresionado muncho. No me lo pude olvidar...

R.: Para entender bien la pintura de El Greco, es nesesario de verla aki en Toledo...

E.: Es verdad. Ya tengo ganas de ver la kaza de El Greco...

R.: Muy bien, vamos i aya. El arte Espanyol siguro es muy reputado.

E.: Munchas grasias, Rafael. Tanto ke dezeava vijitar el “Museo Nacional del Prado”! Ma mi grande dezeo lo realizi tambien kuando vijiti el “Museo de Arte Reina Sofia” en Madrid para admirar el kapolavoro del mas famozo pintor, Pablo Picasso i ver el grande paso del modernismo del siglo 20 i su ovra reputada, “Guernica”.