HUKAT

Dizde ke muryo Miryam, se enkuvryo el pozo de agua ke iva kaminando kon el puevlo. Topandosen a ora el puevlo mankos de agua se rekojeron todos sovre Moshe i Aaron i toman a pelearsen kon Moshe, por ke los kito del Ejipto i los yevo a este dizyerto ke no ay nada de bueno i mizmo agua para bever.

Moshe i Aaron ke ya se avian dezuzado de estas litigas, se deskorajaron muncho de esta nueva pelea, komo ke se fuyeron del puevlo, i se entraron a el Mishkan.

En el Mishkan se les aparesyo la onra del Todo Poderoso, i disho EL Kriyador a Moshe, ke rekojgan a todo el puevlo i ke digan a la penya ke les amostro ai ke kitara agua, i ke bevan todo el puevlo eyos i sus bestyas. Moshe tomo la vara sigun le enkomendo ElKriyador i rekojendo a todo el puevlo delantre la penya, les disho Moshe kon ravya: “Sintid, reveyadores, keresh ke de esta penya vos kitemos agua?” Moshe harvo dos vezes kon su vera a la penya i salyo agua, agua en abondansa i bevyeron todo el puevlo i sus bestyas.

El Kriyador ke ya savemos ke apunta kon los buenos asta el altimo grado, no topo custo este konporto de Moshe i Aaron. Seya por lo ke se aravyaron del puevlo i los trataron kon palavras fuertas, sea por lo ke se fuyeron del puevlo, i no tuvyeron konfiensa en El Kriyador ke tyene el poder de azer unos milagros delantre todo el puevlo por onde no pensan.

Sovre esto le dize a Moshe i Aaron Akoen por este pekado ke kometyeron no vana ser meresyentes de traer a los Djudyos a la tyera prometida, i ke deven murir en este dizyerto.

El puevlo arivo a una sivdad nombrada Or. En este luguar les disho El Kriyador a Moshe i Aaron syendo ke Aaron no va entrar a la tyera prometida, kon esto ke se apronte para murir i espartirse de este mundo. Le dize a Moshe Rabenu ke tome a Aaron i a Elazar su ijo, i ke los suva a la montanya Or, i ayi ke aga deznudar a Aaron Akoen de sus vistidos de Koen Gadol, i ke se los aga vistir a Elazar su ijo, i Aaron ke se rekojga i se mirera ai.

Moshe Rabenu izo el komando del Kriyador i suvyeron los tres a este monte delantre de todo el puevlo, i deznudo a Aaron de sus vistidos, i se los vistyo a Elazar, i muryo Aaron Akoen la punta del monte, i todo el puevlo Djudyo lo yoraron, i lo endecharon 30 dias. I teniya Aaron kuando muryo 123 anyos.

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın