Los “Bayrames” son las mijores vakansas

Los “Bayrames” son las mijores vakansas

En los payizes mizmo laikos de majorita muzulmana los dos “bayrames”-  la fiesta de Ramadan i la fiesta del kodrero kedamos empresyonados en vijitando siertas sinagogas i mizmo si es un tiempo konvenivle – kurban - ande es la tradisyon de degoyar kodreros i vakas mizmo bufanos (öküz). Los ke biven en estos paizes tienen la oportunidad de azer vakansas tres o kuatro dias, i si tienen mazal esta fiesta tura una semana.

Este “bayram” tuve la oportunidad de viajar a Saray (Saraybosna, kapital de Bosna Herzegovina), Mostar, sivdad de Bosnia renomada por su ponte i la Kroasia ke es el pais ke tiene mas de mil izlas ande se topa Split i Dubrovnik, sivdades reelmente turistikas. Para darvos una idea Dubrovnik, ande moran serka de kuarenta mil sivdadinos kon sus anturajes, resive siertos dias kuatro o sinko vapores de kruzes ande serka de dos mil almas por kruz  vijitan la sivdad. Reelmente es una sivdad ke se mantiene solo kon el turizmo i siertos dias tiene komo turistos trenta por syen de su populasyon. Es por esto ke la sinagoga ke es un muzeo en mizmo tiempo reushe a bivir i a dar servisyo a los djudios ke son enteresados.

Tuvimos el plazer de vijitar esta chika sinagoga antigua ke se topa en el segundo etaj de un edifisyo. No se komo era empleado el primer etaj? Ma oy en dia es empleado komo un chiko muzeo. Tienen un tefter ande los vijitores eskriven sus sentimientos i sus punto de vista sovre el muzeo; i yo tuve la posibilidad de eskrivir mis sentimientos en judeo-espanyol al nombre de muestro grupo ke era de onze personas.

En este viyaje tuvimos la posibilidad de vijitar la sinagoga de Split, sivdad chika ke es en el bodre de la Mar Adriatika. La sinyora Altaras, ija de un responsavle de la komunidad,  ke es gia de turizmo mos izo vijitar el palasio i la sinagoga de esta sivdad. No se si vos plaze vijitar sityos istorikos djudios en las vakansas? Ma mozotros djudios turkanos semos enteresados kon los sityos djudios.

Vos kero  kontar siertas kozas sovre la Sinagoga de Saray. Muestro professor de Djudeo-Espanyol, el sinyor Eliyezer Papo es en mizmo tiempo rabi del kal de Saray. Biviendo en Beer-Sheva i enseniando la lingua Djudeo Espanyola en la universidad de Ben Gurion, el reushe a ser rabino de su komunidad mizmo si no esta pronto para esto.

La semana venidera vos va kontar mas sovre la Sinagoga i el muzeo istoriko de Saraybosna. Saludes i Buenos dias (mizmo noches). Puedeser el Rabino Papo va kerer enbiyarmos los livros ke eskrivyo sovre este sujeto mizmo el livro ke eskrivio sovre la Agada de Saray.

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın