Nelli, artista estilista, me konto al sujeto de su ekspozision miksta de Estambol, “De la Koza de Seda” (İpek Kozasından):
“Bushkando una kaza en mi sivdad natal, Estambol, me konsejaron de instalarmos en MUDANYA i no en Estambol, la sivdad sovrepuevlada... En una semana se realizo la mudada.
Los parfumes de la natura de Mudanya, sivdad al bodre de la mar, mos enkanto. El ayre puro, las tempestas mizmo, los pasharos kantando, las yervas freskas, las algas... I en duna un kurso muevo ke frekuenti: İpek Kozası Kursları...
En mi imajinasion suetava, ay anyos, realizar aksesorios kon las Kozas de Seda. Ma komo?
Ke briyo estas kozas (capullos/cocons) de seda salpikados de kolores armoniozas!
En el kurso de invierno realizimos flores komo rozas, trandafilas i unas flores ke deskuvri por la primera vez. No konosia ni los nombres.
Lo ermozo ke el Dio pudo krear...
Si no es mot à mot las mizmas ke se realizaron, mi emosion fue grande - muevas deskuviertas de materyales diferentes - en Bursa, enkontrar los fulares de seda de kolores a kolores...
Desidar de las kolores, koordinarlas estetikamente estuvo keyf para mi… Puede ser sin saver las flores realizadas fueron propios a mosotros kada una...
Los elevos apresian lo ke los otros krean en la klasa. Muestra profesora muy pasensioza mos amostrava kada vez ke mos olvidavamos un detalyo, mos enkorajava, amando lo ke mosos elevos realizimos.”
Antes anyos, estudiando el arte plastiko djunto kon Nelli, los profesores de la Akademia mos repetavan: “No pensesh a imitar la natura por ke la natura es unika… Lo maraviyozo se kreo. Los muzeos del mundo son yenos de ovras de arte.
Kerida Nelli, estuvites bushkando i arrivates a ofreser buketos artistikos ke asemejan a bonbones dulses de la konfiseria…
Kon tus pendientes i broshes, te felisito por tu saver dar la felisidad a la feminita ke gusta atakanar i ornarse de kolifishés.
Te dedikates, te konsakrates por tu amor de krear lo ke no se kreo antes.
La Koza de Seda fue una sorpreza grande...
Sera un plazer de vijitar la ekspozision yamada “YAZ CÜMBÜŞÜ” (La Esplendor del Enverano) en Nişantaş, Estambol, en la Galeria “Ayşe Takı”.
www.nelliart.com
