2500 Nazis Beljikanos estan resiviendo pensia del Governo Aleman

Dora NİYEGO Judeo-Espanyol
29 Haziran 2016 Çarşamba

Los sorbiventes del Holokosto i sus parientes estan mirando a detener las pagas del governo aleman mientras ke Beljika esta ensistiendo ke sus manos estan atadas porke no tienen chifros ofisiales.

Los sorbiventes avlaron kon el ministro de los ofisios finansiero Daniel Bacquelaine, ensistiendo ke mire a detener estas pagas.

El ministro disho a la BBC ke no vana pueder  detener estas pagas i ke los 2.500 nazis beljikanos vana kontinuar a resivirlas de Alemania.

Adolf Hitler afirmo un dekreto (kararname) diziendo ke miles de beljikanos  ke sirvieron en la SS armada, deven de resivir estas pagas. Hitler dio a los miembros de los SS beljikanos nasionalidad alemana en el anyo 1941.

Munchos de estos Nazis bejikanos sirvieron en la marina, en la fuerza aerea de la armada aleman i en el servisio sekreto aleman.

Leon Degrelle, ke ayudo Hitler en yevandole miles de kolaboratores beljikanos para ke lavoren debasho de los Nazis, se fuyo a la Espanya fashista despues de la gerra, ande fue protejado por el diktator Franko asta su muerte en el anyo 1994.

Agora los surbiventes del Holokosto se estan adresando al governo beljikano diziendo ke keren ke establisen una komision i ke los nombres de los nazis beljikanos salgan en medio, para pueder detener las pagas ke resiven.

Pieter Paul Baeten, prezidente del Grupo Memorial, disho a la kavena (zincir) beljikana RTBF ke es triste ke Beljika no esta puediendo kontrolar esta informasion, o  puede ser ke no keren.. porke  dingunos no esta puediendo  entender, en la Evropa de oy, komo Beljika no esta puediendo ambezarse de la Alemania los detalyos de estas pagas.

El ministro  Bacquelaine disho ke va diskutar este paroblema kon  los otros ministros, para topar una solusion.

Segun el Sr. Baeten - un sorbivente del kampo de konsentrasion de Buchenwald, el governo aleman de oy se esta eskondiendo detras del dekreto (kararname) de Hitler,  para no dar enformasion sovre este sujeto a Beljika.

En una respuesta del governo aleman, avian dicho ke no les pueden dar enformasion porke los archives de los ke sirvieron en la gerra fueron detenidos por las otoridades rejionales alemanas.

En el anyo 2012, el governo aleman pago subsidios (sübvansyon) a 209.654 viktimas de los nazis i a sus famiyas, en Alemania i en el etranjero. Tambien 58.932 judios estavan resiviendo kada mez 300 € de un fondo, i  260 de un otro fondo.