Festival del Filmo de Cannes

Esti SAUL Judeo-Espanyol
18 Mayıs 2016 Çarşamba

George Miller, presidente del juri i realizador de Mad Max, Australiano, de la leyenda del 69.en Festival del Filmo de Cannes, dize:

“On est là pour recevoir tous les cinémas du monde.”

(Estamos aki para resivir todos los sinemas del mundo.)

17 filmos van a partisipar a la kompetision para resivir La Palma de Oro.

El filmo de Steven Spielberg: “The BFG”, i el fimo de Jodie Foster: “Money Monster” se van a amostrar sin partisipar a la kompetision..ke tomara fin el 22 de Mayo.

El filmo de Woody Allen: “Cafe Society”, sera para la avyertura del Festival.

En el grande randevu umano se espandio el tapet kolorado para resivir las stares.

Las payetas izieron vibrar la Croisette...

Desde mi chikez me interesi a la sinematografia. Eran los momentos importantes de mi vida kuando angajava al braso de mi madre i me yevava al sinema.

Oy en diya, aspero este Festival ke mos da la posibilidad de admirar los realizatores mondiales.

Mizmo oy, esto esmovida de esta kultura, de los mesajes de paz, de tolerensia...

Este festival, para los pasionados del 7.en Arte Internasional reunisio mis eroes ansianos, mis suvenires:

- Jane Birkin, prezente en Cannes, konto a Patrick Simonen komo debuto, konto sus suvenires del filmo fasinante, “La Piscine” kon Alain Delon i Romy Schneider.

“Je t’aime... moi non plus”, un otro filmo ande la aktrisa Jane Birkin kanto la melodia dulse i romantika de Serge Gainsbourg.

No me puedo olvidar tambien el filmo “Un Homme et une Femme” de Caude Lelouche...

La atmosfera no troko desde 69 anyos en la sivdad Balnearia de Fransia.

Esperamos pueder admirar en serka performansas de Robert De Niro, en el filmo de boks, sin ser un boksor el mizmo, i los dokumentarios maraviyozos; los rejisores perfektos,:François Truffaut i Alfred Hitchcock, ke se reunieron para deshar una ovra inolvidavle en 1966:

“CINEMA ACCORDING TO HITCHCOCK”

(EL SINEMA SEGUN HITCHCOCK)

El livro famozo inspiro realizadores de diferentes jenerasiones, de Martin Scorsese a Wes Anderson, de Olivier Assayas a David Fincher.

Este anyo, por la primera vez, Julia Robert estuvo presente, kon George Clooney i Jodie Foster.

Es una suerte para mozos, los sinefiles, de apresiar la diversita del spektakolo de muestro siglo i de suivar los aktores i rejisores suvir:

LES MARCHES LES PLUS CELEBRES DU MONDE.

(Los eskalones los mas selebres del mundo.)

Para Munchos Anyos!