Beşalah

El puevlo Djudyo salyo de Raamses i arivaron a Sukot. Estando en la sivdad de Sukot, les apronto El Kriyador de una manera milagroza komo dos pilares, uno de fuego i uno de nuve, ke iva adelantre de eyos. El pilar de fuego iva kon eyos la noche por arelumbrarlos, i el de nuve iva el diya por amostrarles el kamino. El sigundo diya, diya de 16 Nisan, enpeso a kaminar delantre el real, el pilar de nuve, i el puevlo se fueron detras de el, i pozo en un luguar nombrado ‘Etam’, ke es en los kavos del dizyerto. De este luguar se puidan ir muy bueno a el monte de Sinay sin pasar por ruvya, tomando el kamino por la parte de Tsafon de esta mar. Pero El Dyo le enkomendo a Moshe Rabenu ke se tornaran atras de este kamino. İ ke apozen delantre de la sivdad Pitom en un luguar estrecho entre mar ruvya i la forterisa de esta sivdad del Ejipto; i los Djudyos izyeron ansi.

Arivando a este luguar, se topa el puevlo de İsrael en un estado muy perikolozo. Paro vyendo ke los Djudyos tornaron a este luguar, penso ke estan mareyados en el kamino i no saven por onde ir i vinir. I olvidandose Paro de todos los males ke pasaron por su kavesa, se aripintyo de lo ke izo de deshar i a los Djudyos de su tyera, i pedrer tantos esklavos arekoje una armada muy fuerte, iva presigir a los Djudyos i los alkansa en este luguar en el sejen diya ke salyeron de Mitsrayim.

El puevlo Djudyo se topa en el mas grande dezespero i no save lo ke azer por ke tomar i gerear kon una armada tan fuerte sin estar eyos aparejados para esto i kon famiyas, mujeres i kreaturas. Fuyir, esto tambien era enposible, syendo de una parte teniyan la mar onda, i de la otra parte el fonsado Ejipsiyano. Otros propozavan de mizurarsen kon los Ejipsyanos sovre lo ke kere ke seya. Otros pensavan de ovedeser a sus vyejos patrones, i tornar atras a Mistrayim a sus esklavaje.

El Todo Poderoso ya save lo ke aze i le dize a Moshe Rabenu ke diga a el puevlo Dudyo ke no se espanten i ke enpesen a kaminar sovre la mar. El Santo bendicho el le dize a Moshe Rabenu, espande tu mano sovre la mar i partila, i ke kamine el puevlo Djudyo por la mar komo fuera tyera.

Moshe izo el komando de El Kriyador i kon un fuerte ayre ke aparejo El Kriyador, se seko la mar komo si fuera tyera. Entraron los Djudyos diyentro la mar i pasaron por ayi myentres la noche entera kaminando komo se kamina or lo seko.

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın