Evenimientos Kulturales

Amanyana diya de Djueves, va ser un diya emportante para muestra komunidad de punto de vista kultural. A la demanyana vamos a topar la okazyon de azer la orasyon de la demanyana en el Kal de İshtipol ke se topa en las alturas de Balat serka de Çarşamba ke es una de las mas relijiozas maales d’Estanbol (de punto de vista de los muzulmanos i no de los djudios).

Tuve el mazal de vijitar esta sinagoga unos kuantos mezes antes por la primera vez.  Ay munchos anyos ke esta keila no es aktiva i malorozamente es muy yuch de konservar un lugar ke no fonksyona. La partikularidad de esta sinagoga es ke es la sola en Evropa i puedeser en el mundo ke es fraguada solo kon tavlas. Fraguada por los Djudios orijinarios de Ishtip - Makedonya en 1694, dospues de un grande fuego en 1899  fue fraguada una segunda vez de muevo kon tavlas i kon la permisyon del Sultan. Oy en diya apartene a la fondasyon de Ahrida – Balat i en empesando de Korin Soryano una grande partida de los diridjentes azen sus posivles para mantener las sinagogas de este kuartier mizmo si de vez en kuando azen aksilik a los ke vijitan estas sinagogas. Para una sinagoga de tavla dospues de sien i kinze anyos todo esta en su lugar. Tiene siertas partidas ke se achunkaron komo la azara ande se topan las mujeres.

En muestro pais tenemos una asosyasyon ke se yama KMKD- Asosyasyon Para Protejar el Patrimonyo Kultural (Kültürel Mirası Koruma Derneği) ande so miembro i enviti a todos para esta orasyon. Reelmente fueron muy enteresados i siertos van a vinir para ver esta sinagoga eksepsiyonal i una orasyon de los djudios.

Avlando de esta Asosyasyon, estan organizando un viyaje (profesyonal) a İzmir para ver, saver i determinar todas las ovras de las minoridades relijiozas ke biven en muestro pais, en primero si son en forma de ruvinas. Esto ayudando para la parte djudia i m’esto ambezando kozas muevas. No savia ke avia tantas tezes ke se prepararon en las universidades sovre las keilas de İzmir del punto de vista arkitektural, istoriko o artistiko. Me ambezi ke avia mas de trenta sinagogas solo en el kuartier ande se topa oy en diya dainda siete o ocho sinagogas. Me ambezi ke la Keila ke se topa en Karşıyaka es empleada komo konservatoryo. Me ambezi ke Nisim Levi Bayraklı ke konstruizo el asansor konstruizo dos diferentes sinagogas en Karataş. Vamos a tener la posibilidad de vijitar la kaza del famozo Sabetay Sevi mizmo si no esta en buen estado.

Si tenemos un tiempo bastante va ser un plazer de vijitar las sinagogas viejas de Tire i de Bergama ke fue restorada por la Munisipalidad de este kazal.

Los Estanbullis o los ke vijitaron Estanbol kreo ke tuvieron la okazyon de vijitar el Museo de los Djudios del Imperio Otomano i de Turkiya. El museo se topava en el Kal de Zulfaris ke antes del Neve Şalom era la Keila ande se kazavan la mas grande partida de los djudios estanbullis. Los dirijentes de muestra komunidad desidieron de transportar este muzeo a la Sinagoga Neve Şalom. Savemoz ke oy en diya no tenemos djudios ke biven en este kuartier. Si ay unas kuantas almas, no savemos si se van o no al kal kada diya mismo diyas de Shabat.

I malorozamente esta sinagoga no fonksyona en los diyas de entre semana. Sus aktividades son diya de Shabat i Alhad. La sinagoga es avyerta kuando se organiza seremonias de tefilin o de brith-mila. Por esta razon djuzgaron ke va ser mas fasil de emplear el muzeo en su muevo lugar. Los ke vijitan Estanbol keren vijitar el Kal de Neve Şalom ke fue atakado dos vezes por los teroristos i estas desgrasyas fueron propajadas en todo el mundo kon la prensa de oy. El Muzeo ke se topava en Zulfaris kreo ke no fue vijitado bastante por el publiko. No se la razon ma kreo ke se devia de vijitar muncho mas.

El mizmo diya – Djueves - dospues de midi va ser la avyertura del muzeo kon la asistensia del Gran Rabino Haleva, el prezidente de la komunidad İbrahimzadeh i todos los miembros del Konsilio de los Reprezantantes de la komunidad. Mizmo vamos a tener un konsierto dospues de los diskorsos i las avlas. Espero ke esta vez el muzeo va ser vijitado komo la Sinagoga d’Andirne ke fue restorada.

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın