Aziz Sancar, El Primer Turko Ke Resivio el Premio Nobel De La Siensia

Dora NİYEGO Judeo-Espanyol
16 Aralık 2015 Çarşamba

Tomas Lindahl, Paul Modrich y Aziz Sancar resivieron el Premio Nobel de Kemika 2015, por aver provado (ispatladılar), al nivel molekular; komo las selulas reparan el DNA danyado, i en mezmo tiempo protejando la enformasion genetika.

Los tres biokemikos amostraron komo fonksyona una selula biva, i komo se utiliza para el developamiento de muevas metodas para kurar el kanser.

El lavoro de Aziz Sancar fue sovre la reparasion de los nukleotidos, ke es el mekanizmo ke utilizan las selulas para reparar el danyo en el DNA. Las personas ke nasen kon defektos en este sistem, se azen kanser de kuero si se estan debasho del sol. La reparasion de los nukleotidos se va utilizar tambien para corijar otros defektos en las selulas.

Aziz Sancar es un biokomiko turko amerikano. El se espesializo en la reparasion del DNA, ke son los puntos de kontrol del siklo selular.

Aziz Sancar nasio en el anyo 1946, en una famiya prove ke biviyan en el distrikto Savur de Mardin, ke es una sivdad situada en el sudeste de la Turkiya. Sancar fue el sieten de los  ocho ijos de la famiya. Su padre i madre no saviyan ni eskrivir, ni meldar, ne teniyan dinguna edukasion. En una entrevista kon una ajensia turka, Sancar deklaro ke en su manseves, el era un nasyonalisto.

Aziz Sancar es un miembro onorario de la Akademia de Siensias de la Turkiya, i miembro de la Akademia Amerikana de los Artes i de las Siensias.

Aziz Sancar fue elejido miembro de la Akademia Nasional de Siensias en el anyo 2005, komo siendo el primer miembro turko-amerikano. Sancar es profesor de biokemika en la Universidad de Carolina del Norte en Chapel Hill, i es kazado kon Gwen Boles Sancar, ke eskapo la universidad en el mezmo anyo kon el. Su mujer es tambien profesora de Biokemika i de Biofizika en la mezma universidad. Marido i mujer, endjuntos, fondaron ‘Carolina Türk Evi’ (Carolina Kaza Turka), ke es un sentro ande profesores i envistigatores turkos se pueden kedar.

Sancar resivyo su edukasion primeria en una eskola serka de su sivdad natal de Savur. El, tomo su titulo de mediko en la Universidad de Estambul, i tomo su doktora en el anyo 1977, en la Universidad de Texas en Dallas.

Duspues ke gano el Premio Nobel, su orijin etniko fue kestionado en los medios sosiales. Sancar disho ke le demandaron munchas kestiones sovre su orijin etniko. Kuando le demandaron en la BBC, si el es “árabo o medio turko”, Aziz Sancar respondyo: “Les dishe ke yo no avlo arabo, i no so kurdo, yo so turko’. El ermano de Aziz Sancar, Tahir expliko en una entrevista ke su familia viene de los Oğuz Turkos ke emigraron de la Asia Santral, i ke eran nasionalistos idealistos. Tambien disho ke el Premio Nobel de su ermano es una onor por la Turkiya.

Sancar es el segundo turko ke gano el premio Nobel duspues de Orhan Pamuk, ke tambien eskapo la Universidad de Estambol.

Por primera vez, un turko resivyo un Premio Nobel de la siensia, de la siensia umana, en el tema de la “Reparasion del DNA”.

Le demandaron, si aksepta si le dan 10 millones de dolares, i le dan el nombre de otra persona a su envansion. ‘No aksepto’ respondyo Sancar. ‘Este premio es una rekompansa por mi lavoro, i deve de yamarse kon mi nombre’.