İtzhak Perlman resivyo La Madalya Prezidental de la Libertad de los Estados Unidos

El famozo violonisto es el el kuarten israeliano ke resivyo el mas alto onor sivil de los Estados Unidos, despues del Prezidente Peres, Prezidente de la Ajensia Judia Sharansky, i Premio Nobel Kahneman.

Dora NİYEGO Judeo-Espanyol
2 Aralık 2015 Çarşamba

Perlman resivyo la madalya de la mano del prezidente Obama la semana ke pasimos, endjuntos kon el direktor de sinema Steven Spielberg, la kantante i artista Barbra Streisand, i otros. Los premios fueron prezentados por el prezidente Barack Obama en el White House, el 24 de Novembre a ‘las personas ke kontribuaron kon sus esfuersos, a la seguridad u a los enteresos nasionales de los Estados Unidos, a la pas mondial, i a la kultura del mundo.

Perlman nasio en İsrael, vino a los Estados Unidos kuando era muy mansevo, i fue entroduizado a los amerikanos, kuando salyo al Show de Ed Sullivan en el anyo 1958. İtzhak Perlman izo su empesijo en el Hall Carnegie en el anyo 1963, kuando teniya 18 anyos.

Allado de la muzika klasika por la kuala el es mas konosido, Perlman tambien djugo djaz, i izo un album kon el pianisto de djaz Oscar Peterson. Perlman fue tambien el solisto para munchos filmos, ‘La lista de Schindler ‘ siendo uno de estos filmos. ‘’La lista de Schindler gano un Oskar por la mijor muzika.

Endjunto kon su mujer Toby, Perlman ansenyo la muzika a los mansevos kon talento, en el Program de Muzika Perlman. Perlman fue tambien un egzamplo emportante por las personas kon diskapasidad.” Allodo de un Oskar, Perlman tambien gano 16 premios Grammy, i kuatro premios Emmy. Perlman resivio esta madalya endjuntos kon el judyo direktor de sinema Steven Spielberg, ke es el kreador de “La lista de Schindler” i de la Fondasion USC Shoah, la organizasion ke dokumenta testimonios de los sorvivientes del Holocausto. Filmos de Spielberg se amostro en el mundo entero i ganaron mas de $ 8.5 mil millones. La aktrista judiya Barbra Streisand resivyo tambien una madalya akel diya. Streisand es la primera mujer ke gano el Globo de Oro por el Mijor Direktor por el mijor filmo “Yentl”. Eya es una de las pokas artistas ke resivio un premio Emmy, Grammy, Oscar i Tony.