Bereşit

El Kriyador kriyo todo el mundo, los syelos i la tyera, i todo lo ke ay en eyos, en 6 diyas.

En el diya sejeno, kriyo al ombre Adam Arishon i a su mujer Hava. İ los metyo dyentro la guerta ke kriyo en el oryente Gan Eden para ke la lavoraron i la guadraron de no deshar entrar adyentro a las bestyas i animales.

El Dyo permetyo a Adam i su mujer de komer de todos los arvoles de fruto ke aviya en Ganeden; afuera del arvol nombrado “ETS ADAAT” arvol de saver ke komyendo de su fruto aze pujar los dezeos i visyos del kuerpo, le defendyo de komer de el.

Hava la mujer de Adam, se sombayo detras de la vista ermoza de este arvol, i komyo de su frute i izo komer de el i a su marido.

El Dyo se aravyo muncho kon eyos por ke pasaron su komando i los maldicho i los destero de Ganeden.

El Kriyador les izo azer a Adam i a su mujer unos kamizas de kuero por ke se taparan sus kuerpos ke estavan desnudos. A Adam le paryo su mujer dos ijos Kayin i Evel. İ kon kada uno de eyos paryo una ija. La ke nasyo kon Kayin se nombrava Kalamana i fue mujer de Kayin, i la ke nasyo kon Evel se nombrava Balvere i fue su mujer. Kayin se okupava del lavoro de la tyera arar i sembrar. İ Evel se okupava de pasear las ovejas.

Kayin i Evel trusheron prezente a el Dyo. Kayin trusho de los frutos de la tyera de lo ke le vino a la mano. İ Evel trusho de los primeros nasidos i los mas ermozos de sus ovejas.

El Dyo amostro su kontentes de Evel i de su prezente no estuvo kontente. Kayin se selo muncho sovre esto i le guadro mal kerensya a su ermano.

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın