Anyada Buena

Silvyo OVADYA Köşe Yazısı
17 Eylül 2015 Perşembe

Keridos lektores. Me vaj a demandar de ke esta semana esto eskrivyendo tan kurto. La razon es ke noche de lunes la sigunda noche de Rosh Ashana teniyamos musafires en kaza mi primo kon su ijo, la tiya Zelda kon su ija, el tiyo Jak, muestra ija kon su marido ke salio por la primera vez a un pranso dospues de la paridura. No es yo ke gizi las koftes de prasa o las bulemas d’espinaka; ma no topi tiempo para eskrivir mi artikolo komo lo esto aziendo ay unos kuantos mezes. Esta demanyana estando en el echo bushki a Virna i le demandi ke tal esta la oja del Judeo Espanyol. Me disho ke esta yena. Ma kije eskrivirvos unos kuantos biervos para dizir vos “anyada buena kon salud, alegria i echos buenos”. Lunes a la demanyana estava en el Kal de Şişli i muncha djente stuvieron en el kal mizmo si era dia de lunes. (Oy en dia es mas difisil para los ke lavoran. Mizmo si tienen postos emportantes en el echo ke lavoran no es muy fasil de no vinir al echo unos kuantos dias en el mez de elul). El sigundo dia kreo ke las keilot no estavan yenas komo el primer dia. Ma kale achetar ke mizmo los mansevos se van a la orasion de Rosh Ashana i esta moz gusta porke esto es la kontinuidad de muestra ley i muestras tradisiones.