El 14en Bienal d’Estanbol

Silvyo OVADYA Köşe Yazısı
9 Eylül 2015 Çarşamba

Esta semana en el Şalom eskrivi un artikolo sovre el Bienal d’Estanbol i sus prolungasyones en la isla Büyükada. Bienal es una aktividad o una ekspozisyon artistika ke se realiza kada dos anyos i ay 27 anyos ke egziste el Bienal d’Estanbol organizado por el IKSV (Fundasyon Kultural i Artistika d’Estanbol). Munchas grandes kompanyias komersiales ayudan i suportan esta fondasyon komo en todas las sivdades emportantes. El bienal el mas antiguo ke savemos es el Bienal de Venezia ke realizo el primer bienal en el anyo 1895. En los bienales se realiza enstalasyones artistikos o siertos filmos i videos ke mostran diferentes kozas. Las enstalasiones se realizan kon el publiko. En siertas ekspozisyones de video komo lo ke es realizado en el Palasio Splendid ke es uno de los mas famozos oteles de Büyükada ya puedesh topar 5 filmos de video ke devesh de mirar i no es muy fasil de entender lo ke keren eksplikar. Si no tenesh el mazal de enkontrar el artisto ke realizo o un giador (rehber) del bienal reelmente es mas kolay de entender lo ke kijo eksplikar. Si no tenesh la uzansa de vijitar ekspozisyones va ser muy estranyo de ver diez karuchas kuatro deyas orizontal i sesh deyas vertikal. I una riga blanka en basho. Lo ke sinyifika? No es muy fasil de entender sin oyir o sin meldar de una broshura de la ekspozisyon.

En la Büyükada la koza la mas emportante fue el dia de djueves ande mas de kinyentas personas de todas las partes del mundo vinieron para la avyertura de esta partida del Bienal. Ver esta djente bien vistida, kultivada, ke s’entiende d’arte i de kultura… Ay anyos i panyos ke vemos en la isla kada dia solo arabos i Estanbollis malorozamente ke vienen de las maales proves. Es djusto ke tienen el derecho de vijitar la isla ma si vemos solo arabos kon mujeres tapadas i mizmo sivdadinos de la mizma manera no tenemos posibilidades de azer aktividades kulturales i artistikas bastante. Estos evenimientos se realizan kon una kolektividad de espektadores.

Kualos son los lugares ke se puede vijitar en Estanbol? Enpesando de la Mar Preta – Rumeli Feneri – i kontinuando en la sivdad pasando por el semanario Agos i la fondasyon Hrant Dink (Jornalisto Ermeni ke fue matado por sus ideas) ke se topan en Osmanbey - Harbiye; en Pera pasando por Arter (galeria artistika del grupo komersial Koç); el Liseo Italyano; el edifisio Cezayir (Algeria); el Museo de Inosensia fondado por el eskrivano Orhan Pamuk ke resivio el premio Nobel de literatura en el anyo 2006; el Orfelinato Fransez; el Muzeo Pera; la Casa Garibaldi; el Otel Adahan ke es un edifisio de la famiya Camondo; el Otel Vault en Karaköy; la eskola primera grega en el mizmo distrikto; el Museo Moderno d’Estanbol. Kreo ke lo konosesh este Bolshevik djudyo ke fue egzilado de la Rusia i fue enstalado durante los anyos 1929-1933 en la Büyükada: el es Leon Trochki. Dospues se fue al Meksiko i dospues de siyete anyos fue matado. Komo los Meksikanos son mas entelijentes (!) de mozotros reusheron a azer un muzeo en el Meksiko i el edifisio en la Büyükada esta una ruvina. La ovra del artisto orijinario de Arjentina reelmente esta travando la atension i les esta gustando.

El primer dia del mez de novembre es el dia dalkavo para pueder vijitar este Bienal.