Şofetim

Rav Yeuda ADONİ Köşe Yazısı
19 Ağustos 2015 Çarşamba

La peraşa Şofetim enpesa kon los biervos siguentes: Cuezes i alguaziles te pondras en todas tus sivdades ke el kriyador tu Dyo te da en tus trivos, i cuzgaran al puevlo kon cuisyo custo. Şelomo ameleh en el livro mişle dize: Los kaminos de la Tora son ermozos, i nos amostran a mozotros bivir en pas. Los kaminos de la Tora realiza la pas. El mundo se kriyo kon pas. El kriyador kriyo el mundo kon agua i fuego. Komo puede ser doz kozas una kontra de otra, la agua i el fuego ke esten encuntos? De aki entendemos la grandeza del Kriyador, la enportansa ke de a la paz, a dos kozas ke son kontra de uno a otra las acunto i formo el mundo kere dizir el mundo es sostenido sovre el simyento de la paz. El Kriyador aze la paz i no la manda de las alturaz. Tambien el nombre del Kriyador es ‘Şalom’ paz. La Tora nos trae a nozotros la paz. La persona ke se entremete en el estudyo de la Tora. Konpra sanedad a su kuerpo i a su alma. Komo lo dişo David Ameleh en el livre de Teilim. La ley ke nos dyo el Kriyador es prinisma i aze arebivir la alma de la persona.

La misyon de los cuezes es de realizar la paz entre la cente, komo meldamos en el livro Pirke Avot en mundo se sostyene, sovre las verdades, sovre el cuisyo i sovre la paz. Sin no ay cuisyo no egiste repozo enel mundo. Una enkomendansa muy sakra meldamos en la peraşa de esta semana:

Vaze ser prinizmo kon el Kriyador: kere dizir la kreyensa, i la esperansa, solamente vaz a tener en el kriyador. El teva salvar, el teva ayudar en todo lo ke esperas il lo ke dezeyas. La manera ke estas avlando deves de pensar. No es deltodo dereço de pensar una manera i avlar otra manera. El korason i la boka deven de estar misma.