Pinehas

Ansi avlo El Kriyador a Moshe:

Pinehas ijo de Elazar, ijo de Aaron Akohen, izo tornar mi sanya, de los ijos de İsrael zelando mi zelo entre eyos. İ no konsumi a los ijos de İsrael en mi zelo. Portanto di mi firmamyento de paz. İ tendra el, i su semen despues de el firmamyento de keuna para syempre.

Ansi enpesa la perasha de Pinehas. El puevlo Djudyo aser kandose a el Yarden pozaron en un luguar nombrado Shitim.

Los Moavim vyendo ke los ijos de İsrael no pensaron de gerear kon eyos, se aserkaron a los Djudyos. Sovre el konsejo de Bilam ke les dyo a saver, ke lo ke se puede venser a este puevlo Djudyo, es kuando reveyan i pasan el komando de El Kriyador. İzyeron todo su posivle por azer trazyerar a los Djudyos. İ ke kovdisyaron en sus ijas i sus mujeres de los Moavim. Malorozamente el puevlo Djudyo se desho venser de su negro apetite. İ se trazyerraron en este partikular, i no mankaron ke sirvyeron i adoraron tambien a sus idoles.

El Kriyador mando una mortaldad entre el puevlo, i muryeron vente i kuatro mil personas. En el tyempo ke estava el puevlo atristado tuvo la ozadiya un syerto Zimri del trivo de Shimon, i tomo una ija de un grande personaje de Midyan, i se la yevo kon un deskaramyento, delantre de Moshe i todo İsrael, en la ora ke todos estavan yorando. Ninguno no tuvyeron el koraje de azer nada a este akto.

Un syerto personaje nombrado Pinehas ijo de Elazar, ijo de Aaron Akoen zelo sovre esta desgrasya i mato kon una lansa, mato a Zimri i a Kozbi bat Tsur. Grasyas a Pinehas ke al punto kedo la mortaldad.

İ El Kriyador le dyo su renkonpensa a Pinehas. İ lo desho bivir munchos anyos. İ le dyo la Keuna Gedola a su semen.

 

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın