Hukat

Rav Yeuda ADONİ Köşe Yazısı
24 Haziran 2015 Çarşamba

Dizde ke muryo Miryam, se enkuvryo el pozo de agua ke iva kaminando kon el puevlo. Topandosen aora el puevlo mankos de agua, se rekojeron todos sovre Moshe i Aaron. İ toman a pelearsen kon Moshe, por ke los kito del Ejipto i los yevo a este dizyerto ke no ay nada de bueno i mizmo agua para bever.

Moshe i Aaron ke ya se avian dezuzado de estes litigas, se deskorajeron muncho de esta nueva pelea, komo ke se fuyeron del puevlo i se entraron a el Mishkan.

En el Mishkan, se les aparesyo la onra del Todo Poderoso, i disho El Kriyador a Moshe  ke rekojgan a todo el puevlo i ke digan a la penya ke les amostro ai ke kitara agua i ke bevan todo el puevlo, eyos i sus bestyas. Moshe tomo la vara sigun le enkomendo El Kriyador i rekojendo a todo el puevlo delantre la penya, les disho Moshe kon ravya: “Sintid, reveyodores, keresh ke de esta penya vos kitemos agua?” Moshe harvo dos vezes kon su vera a la penya, i salyo agua, agua en abondansa i bevyeron todo el puevlo i sus bestyas.

El Kriyador ke ya savemos ke apunta kon los buenos asta el oltimo grado, no topo custo este konporto de Moshe i Aaron. Seya por lo  e se aravyaron el puevlo i los trataron kon palavras fuertes, sea por lo ke se fuyeron del puevlo i no tuvyeron konfiensa en El Kriyador ke tyene el poder de azer unos milegros delantre todo el puevlo. Por onde no pensan sovre esto les dize a Moshe i Aaron Akoen.

Por este pekado ke kometyeron no vana ser meresyentes de traer a los Djudyos a la tyera prometida, i ke deven murir en este dizyerto.

El puevlo arivo a una sivdad nombrada Or. En este luguar les disho El Kriyador a Moshe i Aaron syendo ke Aaron no va entrar a la tyera prometida, kon esto ke se apronte para murir i espertarse de este mundo. Le dize a Moshe Rabenu ke tome a Aaron i Elazar su ijo, i Aaron ke se rekojga i se mirera ai.

Moshe Rabenu izo el komando del Kriyador i suvyeron los tres a este monte delantre de todo el puevlo, i deznudo a Aaron de sus vistidos i se los vistyo a Elazar.İ muryo Aaron A Koen en la punta del monte. İ todo el puevlo Djudyo lo yoraron i lo endecharon 30 dias. İ teniya Aaron kuando muryo 123 anyos.