La selebrasyon del sentenario de muestra eskola

Silvyo OVADYA Köşe Yazısı
27 Mayıs 2015 Çarşamba

Los ke se enteresan a este sujeto saven ke la Komunidad Djudia de muestra sivdad mizmo de muestro pais tiene i apoya una eskola empesando de la mestra (yuva ) fina la fin del liseo. La eskola kontiene dos mestras una en la eskola mizma i la otra en la partida asiatika de Estanbol. Kuando la eskola primera era solo sinko anyos, teniamos una otra eskola en İzmir. Ma kuando se troko el sistema i ke la eskola primera se transformo en ocho klasas, kon la populasion djudia de esta sivdad fue imposivle de sostenerla.

Oy en dia 620 elevos, mas de un tierso de los ke se van a las eskolas preferan muestro Liseo Djudio. En la mestra ke la yamamos “Miniks” otras kuarenta kriaturas estudian.

El Liseo Djudio se nombrava El Liseo Bene Berit porke fue fondado por esta asosiasion i su prezidente Joseph Niego fue mizmo el primer direktor de esta eskola. Era solo una eskola ke los elevos eran achetados dospues de la eskola primera. Es kuando se transporto a Ulus en el empesijo de la anyada skolaria 1994-95 ke la eskola primera i el liseo toparon lugar en el mizmo edifisyo.

1914 es el anyo ande se fondo El Liseo Djudio. I la administrasyon dechidio de selebrar este anyo; 2014-15 komo el sentenario del liseo.

La semana pasada partisipimos a un pranso organizado en el muevo otel Raffles ke se topa en el Sentro Komersial Zorlu ke fue reelmente una nochada muy elegante. Elegante kon los ke partisiparon; elegante kon los fostanes i los vistidos de los invitados; elegante kon el ornamiento de la sala; elegante kon la komida; elegante kon las aktividades ke se realizaron.

Mizmo el sinyor ke estava asentado allado de mi disho a su ermano : ‘’ kon esta asistensia; muestra eskola es kapache de topar apoyo kada vez ke tiene menester .‘’

 En este modo de nochadas el mas grande problema es los diskorsos sin fin i las plaketas o regalos ke se dan a todo modo de dirijentes i a los benefaktores ke ayudaron la fondasyon o la asosyasyon. Ma esta nochada fue reelmente elegante mizmo de este punto. Dospues de su diskorso kurto, el senyor Robert Filiba ke es el representante de la Fondasyon en la eskola envito el sinyor Jan Nahum, ijo del sinyor Bernard Nahum ke fue uno de los mas emportantes personajes durante la fondasyon de la mueva eskola en Ulus, a la shena. El mos konto ke su padre no pudo eskapar el liseo porke devia de mantener su famiya dospues de la muerte de su padre. I eskapo kon la emportansa de la edukasyon en las eskolas.

Dospues de un illuzionisto ke efektuo unas kuantas aktividades, el kantador famozo Ferhat Göçer tomo lugar en la shena. Todos lo konosemos. Ma la mas grande sorpreza era la partisipasyon de kuatro mansevos diplomados del muestro liseo los dalkavos anyos: Vedat Behar ke esta estudiando en el konservatuar i ke tiene mizmo un album en el “i tunes”. (Puede ser no savesh lo ke es “i tunes”. Mizmo si tenesh un telefon Samsung hadrozo koma mi, ya no puedesh alkansar. Devesh de tener un iphone). Mizmo en youtube ya puedesh topar kantikas kantadas por este mansevo. Dospues topimos en la shena tres mansevos tenores kantando kon el famozo kantador. Cefi Aşkın; Semi Moreno i Yusuf Sönmez kantaron komo los profesyoneles. El solo regreto fue ke keriyamos ver estos mansevos mas muncho en la shena.

Esto ogurando anyos yeno de sukseso a muestra eskola kon munchos elevos i munchos diplomados.