La komemorasyon de la Shoa

Silvyo OVADYA Köşe Yazısı
22 Nisan 2015 Çarşamba

Kada anyo el mez de Nisan reelmente stamoz okupados kon munchas festividades i komemorasyones. Kada asosyanyon o grupo kere ke todos los miembros de la komunidad asisten a todas estad aktivitades . Ma kreo reelmenteke es imposivle. No se kuando empesimos a komemoraren muestra komunidad el Yom a Shoa ma se ke los 40-45 anyos d’alkavo komemoramos la revolta del Getto de Varsovie. Reelmente es muy emportante esta data i este evenimiento. Porke todos los mansevos deven de saver ke es possibled ke un fashisto komo Hitler fue la razon de la muerte de sej miliones de djudios entre eyos un milion i medio de kriaturas. I deven de saver ke esto no se puede realizar en este siglo. Las kriaturas se ambezan este evenimiento kuando tienen trece o katorze anyos. Esto es lo ke se ambeza en muestra komunidad o en las komunidades djudias . Ma malorozamente no es la mizma koza por los ke no son djudios. En las eskolasTurkas ensenyan la segunda gerra mondial solo en la klasa dalkavo del liseo ande los estudyantes azen grandes esforsos para entar a las universitades (en Turkiya ay mas muncho de doz milyones de estudiantes ke entran en el egzamen de achetasyon i solo los setesientos miles son akseptados.)

 Vos kero kontar lo ke bivi en İsrael kuando estavamos por una vijita ofisyal kon el primer ministro Erdoğan siete- ocho anyos antes. Kuando estavamos vijitando el Museo del Holokosto “El Yad Vashem” era por la primera vez ke siertos parlamentarios estavan viendo este modo de photos sin entender lo ke es. Les konti kualo afito en la Segunda Gerra Mondial i era la primera vez ke sintian el Holokosto . Ke desgrasya kultural…

Savej lo ke ize kuando retorni a la Turkia. Demandi a mis amigos ke azen translatar en turko el livro del muevo muzeo de Yad Vashem. Lo izieron. I demandi al ambasador turko de Tel Aviv de prezentar estos livros komo regalo a los ke van a ir a vijitar el museo de Yad Vashem. No se si estos livros fueron dados a estos vijitadores ma yo tengo la konsensya repozada.

 Si tuvitej la okazyon de vijitar el Museo de Yad Vashem i la partida fraguada para la memoria de un milion i medio de kreaturas no es posible ke staj en repozo este dia…

 Los evenimiyentos ke se bivieron en estos anyos tiene un rekuerdo diferente en mi vida . Los parientes de mi madre orijinaryos de Estanbul i Bursa tuvieron el mazal de renkontrarsen i kazarsen en Francia en Paris . Mi tio ke nasio en el 1924 i mi madre ke nasio en el anio 1929 eran fransezes ma no sus paryentes . Eyos eran turkos ma kerian preferavan ser fransezes para tener todos los derechos de sitizanos.Tuvieron una vida reelmente yeno de difikultades durante kuatro anyos. Mi tio i mi madre eran obligados de portar la estrea de sej puntos i aryentro estava eskrito Djudio en fransez. Del primer dia la majorita de sus amigas no avlaron mas kon eya en la skola. Eya stuvo serka dedoz anyos en un monasteryo espanyol ande las sores l’ayudaron a ke s’eskonde . La famiya Profetta de mi madre todos tuvieron el mazal de kedar en vida sin irsen a un kampo de konsontrasyon. Los parientes de mi madre komo no eran fransezes tenian toda la vida una mensualidasd ke tomavan de los Almanes. Komo mi madre i mi tiyo eran fransezes esta indamnita fue pagada a la Komunitad Djudia de Fransia.Reelmente yo nasi por azardo de esta madre porke biviyan en el diezen kuarter djusto en frente del onzen ante la mas grande partida de los djudios de esta rejion fueron deportados. Ya basta de mauyar tanto. Agora pasaremos a la seremonia.

Los Ashkenazes keren ke el Yom a Shoa se selebra en el kal de los Ashkenazes . El akordo es ke kada doz anyos la selebrasyon es en el kal de Neve Shalom i kada doz anyos en el kal de los Ashkenazes. Los Askenazes kada vez trayen un kantor (dizimoz hazan para los ke azen la orasyon en los sefardim i kantor para los ke azen la orasyon en los kales ashkenazim.) I este anyo el kontor de la Sinagoga de Viena el kantor Shmuel Barzilai era el star de esta komemorasyon... Kale dizir ke una noche antes este kantor dio un konserto en el Neve Shalom. Kualo ez lo ke azemoz. Kada anyo un mansevo moz da un diskorso sovre el olokosto. Se asyende sej kandelas por el Hahambashi, el prezidente de la komunidad; el Konsul d’Israel i los prezisentes del Neve Shalom; de la komunidad Ashknaz i del Fakirleri Koruma. Agora todos l’astan asendando en tomando otra persona al lado…