Un Livro Enteresante: “Art Juif ou art des Juifs?”

Esti SAUL Judeo-Espanyol
16 Nisan 2015 Perşembe


El vapor me estava yevando de Kabataş (punta del Bosfor) a las islas.

Kon grande entereso estava meldando un artikolo del semanal L’Express:

“Art Juif ou art des Juifs?”

Jacques Attali estava ekspozando sovre un livro eskrito por Gabriel Sed Ragina, kon la kolaborasion de Ziva Amishai i otros, ovra de la grande koleksion Mazenod Citadelle.

“L’ART JUIF” (EL ARTE JUDIO)

El kontenido mos dize ke:

“La tradision estetika demanda ke no egzistiera el arte Judyo por razon de la interdiksion biblika de imajes (figuras)...

Esta ovra mos transmete al kontrario, la prezensia de las reprezentasiones artistikas, por todos los interstises del ritual ebraiko, desde los tiempos los mas ansianos, al entorno del Templo de Yerushalayim i las de la Diaspora.

Unos de los mas spektakulares vestijios son los de la Siria, yamadas:

Doura-Europos.

El arte Judio, mas despues, se torno verso los Livros i las enluminuras, kreando ovras inesperadas de ermozura.

Despues de la imprimeria i la “Renaissanse”, el TEMPLO desparesido i el Livro aleshado, el arte Judio se troko en Arte deJjudio.

A partir del siglo XIX, korientes pikturales konsideravles, traversaron los getos en Polonya i Alemanya i enfin en la Evropa.

Un grande merito de este livro es de azermos deskuvrir los talentuozos pintores Gottlieb, Liebermann, i sinyalar la dimension Judia de Chagall, Soutine, Pissarro, Sonia Delaunay, Man Ray, Libchitz, Lichtenstein, Brauer, Rothko i munchos otros.

Su partikularita es alora de ofreser una vizion partikular i universal, lokal i nomado, vizionario i nostaljiko ets.

El sujeto estuvo muy enteresante; sovretodo porke me estava preparando a ensenyar el Arte a los mansevos Judios de un kurso de vakansas.

No me rendi kuento, konsentrada a mi lektura, ni komo paso la ora ni ke vino el momento de akostar a la eskala ermoza de las 4 perlas de la Mar Marmara.

Despues del resivo kayente i benevolante del grupo simpatiko, eskoji komo lavoro para el 27 Julio, el kolaje, viendo el intereso i el progreso de los anyos pasados.

Los mansevos krearon en kortando, kolando, todo en siendo fideles a las reglas del espasio i de la kompozision, bushkando la tresera dimension: Elementos ke introdusiron.

Eran munchos amigos amistozos al entorno de una grande meza! …

Un luzyo tablo de ijas, ijos burlandosen de las ovras del vizino o kopiandosen o demandando tijera, papel, kola para apegar.

Me da una buena umor de admirar sus ojos animados de plazer a la vista de sus kresiones apresiadas.

Namorados de arte, el grupo forma en si mizmo UN KOLAJE DE ARMONIA.

Bushkimos endjuntos Lo ermozo, lo bueno i la verdad; todo en suetandovos, keridos lektores, Anyos Buenos, i pas en el mundo para todos:

HAG PESAH SAMEAH