La Seuda de Shabat

Silvyo OVADYA Köşe Yazısı
15 Nisan 2015 Çarşamba

Deves en kuando empesaj a eskrivir un artikolo i no savej kualo va ser el titolo. I este es uno de este djenero.

Dia de shabat ke era el dia dal kavo de Pesah estava en la Sinagoga de Ortaköy para la tefila. Kualo era la diferensia de este shabat? La primer diferensia era ke era dia de mued  i la sigunda diferensia era ke la seuda de este dia era oferta por el prezidente de la munisipalitad de Beşiktaş el sinyor Murat Hazinedar. Kale dizir ke la sekretarya del presidente la sinyora Rakel Levi ke es miembra de muestra komunidad esta kontinuando este posto  empesando del presidente pasado. No es de uzo ke un prezidente de una sivdad o de un kuarter da una seuda en una sinagoga i sovre ke era Pesah. Ma fue este modo.

En primero kuando vino al Kal a la fin de la orasyon antes del Musaf el prezidente de la Fondasyon de Ortaköy el sinyor  Albert Elvaşvili avlo unos kuantos biervos para dizir le “buen venida”. El prezidento kuando empeso su avla signifio ke munchas minoritades no tienen mizmo oy en dia grande sempatia para el “Partido del Puevlo” (Cumhuriyet Halk Partisi) ke fue el primer partido politiko en la Republika Turka. I malorozamente fue el partido uniko en los primeros anyos de la republika.Eksprimo sus ideas en signifikando ke estos evenimientos se realizaron en estos anyos.

Yo; le esto dando razon al prezidente ke kale trokar el punto de vista kontra este partido  malgrado ke mi famiya fue tokada por el “Dasyo del Aver” (Varlık Vergisi) ke fue aplikada sin djustisia durante la Sigunda Gerra Mondial en el anyo 1942. Komo este evenimiyento, malorozamente las minoritades relijiozas i partikolarmente los djudios bivieron siertos evenimientos durante la administrasyon de este partido ke era el uniko. Es vedra ke es difisil de atchetar estas indjustias mizmo dospues de setenta anyos.

En tres mezes tenemos las eleksyones para la asamblea nasyonal ke forma el governo i tiene la otoritad de pueder trokar todas las leyes. Tenemoz en Turkia mas de ochenta partidos politikos i solo los vente i sinko partidos tienen el derecho de tomar parte en las eleksyones. Ma malorozamente kon la limitasyon de 10% de votos solo tres o kuatro partidos van a pueder topar lugar en la Asamblea. Ay doce anyos ke el “Partido del la Djustisia i del Desvelopamiyento” (Adalet ve Kalkınma Partisi) esta en el poder i todos los otros partidos estan aziendo todo modo de esforsos para tomar parte en el poder.

En estas eleksyones uno de los mas enteresantes puntos es ke tres partidos politikos estan prezentando kandidatos Ermenis. Puedemos sugjerar de diferentes puntos de vista este fakto. Devemos de achetar ke en la komunidad Ermenia  oy en dia puedemos ver  munchos jornalistos, eskrivanos i entelektuales ke toman parte en los partidos politikos i ke se prezentan en las televizyones en todo modo de programes politikos. El rezultado es ser kandidato. Kreo ke la data de este anyo es el segundo punto para eskojer kandidatos Ermenis. Savemos ke este anyo se esta komemorando el siglo de los evenimientos ke tuvieron lugar en las tierras turkas kontra los Ermenis. No se ken tenia razon ken no tenia ma el rezultado fue muy triste.

Si devo de komparar kon la Komunidad djudia puedemos dizir  ke los djudios son mas homogenes ma los Ermenis puedeser komo son una popülasyon mas famoza (Oy en dia son una komunidad kreo de sesenta mil almas ma kreo ke en Anatolia ay munchos musulmanos  ke eran Ermenis i ke trokaron de relijyon dospues de los evenimientos de 1915) tienen ideas maz diferentes i es posible de renkontrarlos en todo los kampos. El segunto punto es ke la Komunidad Djudia es dirijada por la prezidensia de la komunidad i las fondasyones no tienen el poder nesesitozo para dar reaksyones. Las tras minoritades relijiozas no tenen el posto de prezidente i las komunitades relijiozas son enkavesadas solo par los relijiozos (los patrikes).

30 anyos antes kuando el Şalom empeso a publikarse en turko fue una reforma de ekspresyon puedeser un poko limitada para la Komunidad Djudia. Kuando el Agos (semanario en Turko ke fue publikado por el sinyor Hrant Dink i sus amigos) empeso su publikasyon fue una grande revolusyon en la komunitad de los Ermenis i en la prensa turka. Ma malorozamente el sinyor Dink fue matodo por un grupo de nasyonalistos achakes de sus ideas i de sus artikolos. El era maz koırajoso i eksprimo todo modo de ideas en su semanaryo. Komo no tenia relasyones kon su komunidad era mas fasil de eskrivir todo lo ke keria.

Espero ke en muestra komunidad siertas personas van a kerer lavorar independentes en los partidos politikos i vamos a ver siertos parlamentarios elijidos ma sin proteksion en el futuro.