Pesah en la mano

Dora NİYEGO Judeo-Espanyol
18 Mart 2015 Çarşamba

Komo savesh todos, fin tres semanas, vamos a selebrar la fiesta de Pesah, kon muestras famiyas, todos aunados en una kaza. Vamos a empesar a merkar la matza, la arina, los guevos, i las muezes para azer buermelikos, gatos de Pesah. Unos dos tres diyas antes de Pesah, las mujeres judiyas mos vamos a meter a gizar, i a aparejar por la noche de mued.

Las fiestas de muestra chikes eran muy diferente de las de oy. Los judyos de Estanbol, todos moravan en las mezmas partes de la sivdad.  De sorte ke, akeyos diyas, se sintiya la emosion i la alegriya de las fiestasen estos lugares. Mezmo los vendedores ya empesavan a aparejar por la fiesta judiya. Komo dize en la kantika: ‘Purim purim purim lanu, Pesah pesah en la mano’. De ke eskapo Purim, los aparejos de Pesah ya empesavan. İ komo todos biviyan endjuntos, kaliya ke todos suivavan los ritueles de las fiestas, sino los otros lo remarkavan.

Los aparejos de Pesah eran muy pezgados akeyos diyas. Alimpiar la kaza, lavar los perdes,los tapones, los manteles, i duspues repasarlos o kolaladeyarlos, i meterlos al lugar. La kuzina se vazyava entera, los almaryos se alimpyavan, no kaliya ke kedara ni una miga de pan en dingun lugar.

Kuando la limpyeza eskapava, empesava los ampletes i los gizados. El dulse blanko, el masapan, los gatos de Pesah, los guevos kochos, los burmuelos de matsa, las fritadas de espinaka, las albondigas de prasa, las dolmas de tomat, de pipirushka, i de kalavasa, los rulos de berendjena, el kodrero, las patatas al orno. Esto tomava buen karar de tiempo, i finke el diya de Pesah viniya, las mujeres ya estavan boladas.

Primera noche de Pesah, todos los paryentes se arekojavan en una kaza, i todos viniyan kon un buketo de rozas. Kuando los ombres tornavan de la Sinagoga, todos se asentavan al enterno de la meza, i empesavan a dizir la Agada. ‘Se lavaran las manos’, kada dos punto era lavar las manos. ‘Dan, sefardan, kinim, arov’ – ‘İjikos no miresh por aya!’. İ mozotros los ijikos miravamos kon kuriozita del kenar del ojo, kualo estan echando del djarro ariento la kaldera.

En muestra chikes, ya konosiyamos la sinyifikasyon de Pesah, ke es la salidura de Misraim, la endependensya de muestro puevlo. Kada anyo, selebramos este evenemento ke paso miles de anyos antes. Komo meldamos en la Agada, en kada jenerasion, kada judyo es ovligado de repetar lo mezmo, komo si el fue, el ke salyo de Misraim.

Kada anyo, komemos el pan ke no tuvo el tiempo de levdar, el harose, las yervas amargas untandolas al vinagre, por akodrarmos la amargura de muestros ansestros. Allado del Korban Pesah, metemos un guevo kocho ke semboliza la fekondidad, i la esperansa. Los kuatro vazos de vino sembolizan la libertad. Komemos la matza, la lechuga, kontando a las kreaturas las maraviyas ke izo el Dio, para kitarmos de Misraim. İ en komiendo las komidas savrozas, mos sintimos ke somos un ‘Senyor’, i no un ‘Esklavo’.

Anyos antes, duspues de la orasion, kantavamos todos endjuntos, kon grande alegriya las kantikas de Pesah: ‘El Kavretiko’, i ‘Kuelo es el Uno’.

Estos rekuerdos de muestra chikes, no se puede ir de muestros ojos. Oy, las mujeres judiyas estan mirando a azer lo mezmo, para transferar muestra erensya a muestros ijos, ma seguro kon mas livianes, i kon el ayudo de la teknolojiya.

Pesah alegre al mundo judyo!