Dospues de la muerte de Yaşar Kemal

Silvyo OVADYA Köşe Yazısı
4 Mart 2015 Çarşamba

Unos kuantos anyos antes kuando el eskrivano Orhan Pamuk resivyo el premio de Nobel sovre la literatura, munchas personas pensaron ke este premio era el derecho de Yaşar Kemal ke fue munchas vezes kandidato a este premio. Ma deve de ser ke era el mansevo Orhan Pamuk ke lo meresio.

Ay tres dias ke supimos la muerte de Yaşar Kemal, reelmente uno de los mas famozos eskrivanos turkos. Siertas de sus ovras fueron trasladadas en mas de kuarenta linguas. Puedemos sitar las ovras las mas emportantes komo: İnce Memed (El Halcon); Yer demir Gök bakır (Tierra de Fierro, Cielo de Cobre); Yılanı öldürseler (Si matan la kulevra)… Ken era Yaşar Kemal? Nasido en el anyo 1923 serka de Adana (una sivdad en el sud de la Turkiya), miembro de una famiya Kurda, tuvo el desmazal de ver la muerte de su padre por razon de un problema de sangre (kan davası)teniendo solo sinko anyos.

Dospues de este evenimiento empeso a avlar muy tadre ma reusho a eskrivir; mizmo a eskrivir muncho (Se kere pasensia para pueder meldar sus livros de unas kuantas syenes de ojas).

Yaşar Kemal pyedro en el anyo 2001 su mujer de 50 anyos, Tilda. Ya savesh ke Tilda no es un nombre de muzulmanos. Su mujer djudia nasida Matilda Sorero era la inyeta del famozo mediko del Sultan Abdulhamid, el sinyor Jak Mandil Pasha. Eya era la ija del direktör general de la Banka Otomana. Su mujer Tilda ke konosia komo sus linguas maternales el Turko, el Inglez, el Fransez i el Espanyol fue la traduktrisa de sus livros. Eya izo munchos esforsos para ke su marido seyga konosido en todos los serklos akademikos i litarales. De mizmo lavoro para ke sea konosido en los paizes estranjeros.

Dospues de la disparision de su mujer Tilda ke fue enterrada en un simiteryo muzulmano, las palavras ke pronunsio Yaşar Kemal fueron “Tilda , mi amor; te rengrasyo. Mi amor te rengrasyo por la vida maraviyoza ke me dates. No t’espantes, tuvimos una vida yena de onor i de orgolio”.

Lunes una seremonia fue realizada en la meshkita i dospues en un sentro kultural en la onor del eskrivano Yaşar Kemal. Suetamos ke sus livros seyan meldados por las jenerasyones sigientes.