Vos estamos asperando el 8 Febrero, dia de Alhad

Silvyo OVADYA Köşe Yazısı
5 Şubat 2015 Perşembe

La semana pasada komo era las vakansas de medio anyo ke dizimos “el konje del semestre” de mi ijo Eyal i komo es muy difisil de tomar vakansas kuando lo dezeamos, pasimos toda la famiya unos kuantos dias en otro pais. Martes la noche era la komemorasyon ofisiel del Olokosto i el prezidente de la Komunidad el sinyor Ibrahimzadeh envito mi madre a Ankara para asender una kandela. Eya paso la segunda gerra mondial en la Fransia, una partida en un monasteryo Espanyol en Paris mizmo; ande topi la oportunidad de vijitar kon mi mujer kuatro-sinko anyos antes. Komo no tiene su memoria komo la tenia unos kuantos anyos antes, preferi ke no se vaya en no estando kon eya. Ke koensidensia ke mi telefon selular fue blokado del martes a medio dia fin a la manyana de mierkoles. I fue en este tiempo ke en Ankara durante la Seremonia del Olokosto el prezidente del parlamento, no kijo asender la kandela i avlo siertas kozas ke deranjo la majoridad de los partisipantes. I yo komo no pude resivir los mailes estava muy repozado…

Kuando torni a Estanbol, la koza la mas emportante fue de reanimar el  “Dia Internasyonal del Ladino/Judeo-espanyol”. Avlando kon Karen, izimos unas kuantas modifikasyones en el program i planifikimos mizmo un program diferente sin muzika.

Esta vez tenemos mizmo dos grupos ke mos van a kantar. Tres ekspzisyones de ancha o estrecha kontenido. La primera de Esti Saul, la sigunda de Süzet Herman i la tresera organizada por el Muzeo de la Fondasyon de los 500 anyos  “Del dip del baul” ke se kompoza de fotografias de los Sefardim de kuarenta, sinkuenta i mizmo noventa anyos antes.

El sinyor Pablo Asuero direktor del Sentro Cervantes mos va aklarar sovre la proteksyon Espanyola en el Imperio Otomano. Dia de Alhad vamos a topar la posibilidad de sintir al sinyor Mario Levi ke es reelmente un autor muy famozo i no se si lo sintitesh en judeo-espanyol…

La sinyora Ceni Franko, kordonbleu de todo modo de komidas i partikolarmente del gizado sefaradi, mos va azer una demonstrasyon sovre unas kuantas diferentes komidas. Vamos a ver la ke mos va prezentar.

Tres semanas antes Jojo Eskenazi, konosido komo Moiz ke koensidensia ke estava en viyaje. Ma esta vez no tiene la posibilidad de no estar kon mozotros kon sus parodias. Este Alhad vamos a topar la oportunidad de sintir el sinyor Jojo Kohen kon sus anekdotas.

Las sinyoras Anna Eskenazi, Süzet Herman i Karen Şarhon mos van a prezentar una parodia o una piesa no se komo nominarla.

Al medio dia vamos a komer una komida sefaradi gizada por la Casa Barınyurt ke es famoza por sus komidas kasher ke se prezenta en los aviones de Turkish Airlines.

Voz puedo kontar otras kozas; konferensias; prezentasyones; filmos i otras aktividades. I por finalizar, el konserto de las Estreyikas d’Estambol, ke estan fiestando sus 10en anyo de fondasyon.

Si keresh estar kon mozotros devesh de telefonar al Şhalom i avlar kon la Sra. Emel ke es la patrona de las rezervasyones.

Vos estamos asperando dia de Alhad. Al vermos…