BEKİ L. BAHAR

La eskritora inolvidavle, kon su poema ÇAN, EZAN, HAZAN, fue una de las koronas de muestra komunita, una damma de grande valor. En su livro Koronas: (poemas), BEKİ L. BAHAR “Enflorese en la alma koplas ke enkanta su propia persona”.

  BEKİ L. BAHAR

LA FADA KE KORONA

Kreye ke es una fada

Ke enkorona de fama

Enbraza su alma

El esklavo de el arte

El artisto la ama

De una amor santa.

 

En su soledad

Diya i noche

Kon esperansa la aspera.

Kuando tadra

U no viene

El amante

Se desespera.

 

Kedo en mi lugar

Sin meneyar

Seko mi paladar

Syegos mis ojos,

Kuando me parese

Ke aparese la solombra

De mi dezeyada fada

Ke me enspira koplas

Ke me desha enkantada.

 

La fada,

Una senteya

El soplo ke briya,

Aze mi vida

Una divina poesia

 

Dizen ke es una fada

Ke kuando vijita la alma

Enkontra de fama.

KORONA

El ke fue sukuenta anyos

La korona de mi vida

Ni me embivda

Ni me kita.

 

Korona de mi vida,

No me syento espartida

Kuando avlando

Kuando kayado

Syempre estas a mi lado.

Nunka seras olvidado....

En su livro Koronas: (poemas) de BEKİ L.BAHAR, puedemos meldar:

En memoria:

De mi ermanika

Ester Morhayim Rabinovich.

Poemas dedikadas tambien a mi madre, padre, tiyos, tiyas i a todo el ke en mi chikes en esta lingua me avlavan...

Un chiko paragrafo de su “OTOBİYOGRAFIA UNA KONSEJIKA”:

“Yo tambien era una korona, Primera korona de un grande amor, de mi padre i mi madre. Un amor ke solo se puede ver entre dos guerfanos. En la ermoza sivdad de Istambol, los alhas kon eyos era maraviya, kurto ni dert ni kasavet teniya en mi chikes. Ken i ken me trayera cugetes i bonbones...

Ladino es? Djudeo Espanyol es? La moda de eskrivir es; mesklar i ajustar biervos del verdadero Espanyol.i del vyejo Kastilyano... Kreyen ke ansina pueden entender los Sefarades del mundo entero. No se avlava en mi chikes, no lo se. un trahison me parese...

BEKİ   L. BAHAR”

La kerida Beki ke me avia ofrido su livro en Izmir ande estuvimos kon el grupo de LADINOKOMUNITA, ke me inspiro. Retornando a Estambol en el vapor, spontanemente, me meti presto a desinar sovre sus pajinas blankas. Regreto ke la poeta ke korono muestra egzistensia no lo supo. Espero ke un diya sus inyetos me bushkaran, les puedo mostrar o ofrir el livro Koronas: (poemas) desinado por Esti Saul.

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın