La Leyendaria Aktrisa Marilyn Monroe

Esti SAUL Judeo-Espanyol
20 Ağustos 2014 Çarşamba

Un livro intitulado Marilyn Monroe - Fragments aparesio en Fransia el 7 oktobre, 2010, editado por Le Seuil, ke mos revela el jurnal personal de Marilyn Monroe, ke no vido el dia asta oy.

Lee Strasberg, aktor reputado, ke djugo en el filmo “The Godfather 2” para enkarnar un riko judio, Hyman Roth, fue el profesor de Marilyn Monroe. Despues de la disparision de su eleva Marilyn, Strasberg, ke fue en New York el kreador del teatro Amerikano (konsiderado komo el padre del “method acting” en Amerika), se aproprio de las notas de Marilyn Monroe, eskritas en su karné intimo. Estas memorias eskritas por la famoza aktrisa, es Anna Strasberg, la mujer de Lee, ke las entrego a Stanley Buchthal, amigo de la famiya  i demando ke sea editado en Fransia.

Marilyn investigadora de Arte del “Renasimiento”

Lo ke mos sorprende es los kapitulos del livro ke kontan las bushkidas

konsernando los Beyos Artes, su intereso al teatro, los livros i muzeos de su epoka.

En sus notas, se puede meldar i enkontrar la importansa ke Marilyn dio a los eskrivanos komo Samuel Beckett, John Milton, James Joyce…

El editor del livro, BERNARD COMMENT lo komenta ansi:

“Marilyn es kompletamente diferente de su adjektivo de Blonda Bova. Se deskuvre en este livro las difikultades i sufriensas ke bivio su alma sensivle. Eya bushkava la verdad.”

NORMA JEAN MORTENSON

Marilyn Monroe, muestra idola, nasio en 1926 en Los Estados Unidos. Se yamava Norma Jean Mortenson.

Debuta su kariera komo modelista. En poko tiempo, parviene a devenir una de las mas grandes aktrisas del sinema Amerikano.

Su sensibilita poetika, sus premios nombrozos i sus amores famozos kon John F. Kennedy, intereso el mundo entero. Malorozamente, en 1962, metio fin a su vida; tenia solo 36 anyos.

Grasias ke mizmo tadre puedimos deskuvrir la kara deskonosida de Marilyn Monroe, remarkable personaje yena de ermozuras non sansuradas ni maskadas.

Entre los kapitolos, puedemos meldar:

NOTAS PERSONALES

1943, NORMA JEAN MORTENSON se kaza kon JAMES DOUGHERTY el 19 junio 1942 en Califonia. Evita ansi de retornar al orfelinato. Estamos sorprendidos i impresionados de la maturita de Marilyn (Norma) ke solo tiene 18 anyos kuando deskuvre la traision de su marido kon Doris Drennan.

El divorse toma lugar el 13 septembre de 1946.

Ke MM,.aktrisa de Holywood, es realmente apasionada de literatura, va enkantar los amatores ke tienen una opinion fiksa. Munchas fotos  la amostran fotografiada kon un livro en la mano.

Entreteniendose kon un jurnalisto fransez, Georges Belmont, en 1960,

Marilyn evoka los primeros tiempos de su kariera.

“No me aziya ver en las premieres, ni en las reprezentasiones de la prensa, i resepsiones. Es simple: me iva a la eskola. No pude nunka eskapar mis estudios. Bueno, alora frekuentava la Universita de Los Angeles la noche. Entre el diya ganava mi vida kon chikos roles ke me davan en los filmos.

Segiya kursos de literatura, istoria de mi pais, i meldava muncho”

Su biblioteka era kompozada de 400 livros de los klasikos (Milton, Dostoievski, Whitman), los kontemporaneos (Hemingway, Beckett, Kerouac). Arthur Miller, su marido, djuga mas tadre un rolo, en konsejando a Marilyn de meldar las biografias de Carl Sandburg, Abraham Lincoln, ke avia englutido. Avia meldado Ulysses de James Joyce.

Marilyn,.el Sex-symbol, se save, inspiro nombrozos pintores: Picasso, Warhol, de Kooning, Dali… Tenia un intereso partikular al Arte de Pintura. Boticelli, Goya, i en partikular sus “Demonios”.

“Lo konosko muy bien a este ombre. Tenemos los mismos esuenyos. Desde chika, me sonyo de demonios.”

Las baylarinas de Degas los kontempla kon grande plazer i Rodin es el skulptor ke admira en Metropolitan Museum.

Meldando el livro Fragments, se apersive de Marilyn kultivada, kurioza, kon una volunta fuerta de entender los otros, el mundo i el destino i de  entenderse eya mizmo.

La totalita de los dokumentos revelados oy es un trezoro. MM toma notas, eskrive sus sentimientos, sus pensadas i interogasiones.

MM se okupa kon presizion i metikulozamente de los echos kotidianos. Malgrado su aspekto kaotiko,.kuando devia de preparar un aniversario en su kaza, las listas eskritas kon detalyos eran remarkables. Kuando dekora

su apartamento, toma notas i koleksiona los eshantiyones.multiples. Puedemos ver el aspekto de una mujer ordonada

Antonio Tabucchi eskrive en la Prefasa del livro Fragments:

“Si era un filmo, puedia ser un Flashback. Se puedia ver una ijika a la kara dulse i ojos grandes ke se yama Norma Jean, vestida de un collant i dos alas transparentes ensima sus ombros, ke asemejaria a una kriansa (creature – yaratık) vinido del mundo de Peter Pan.

“I guess I am a fantasy” (kreygo ke so una fantazia).

Estas son las palavras de Marilyn en 1959.

Kon muestra admirasion a MM.

Esti Saul.

Marilyn Monroe - FRAGMENTS, Poemes, Ecrits intimes, Lettres

Editado por: STANLEY BUCHTHAL i BERNARD COMMENT

Edision Le SEUIL ke aparesio en oktobre 2010.

Los tekstos ineditos de Marilyn Monroe eskritos entre 1943-1962.

El universo interior para deskuvrir una orta kara de la ikona.