El periodiko alman ‘Die Welt’ eskrivio ke, setesientas letras eskritas por Heinrich Himmler estan guadradas en una banka en Tel Aviv. Estas letras salyeron en medio sesh anyos duspues ke el shef de SS se suisido, ke era la fin de la Segunda Gerra Mondial. Segun ‘Die Welt’, estas letras sinyadas ‘Tu marido’ o ‘Tu padre’, tienen la mezma eskriturya kon otras letras eskritas por Himmler.
‘Me esto indo a Auschwitz’ eskrivio Himmler en una de sus letras.
Duspues de la gerra, dos soldados amerikanos toparon sienes de letras, i dokumentos en la kaza del Nazi. Estas letras pasaron a la mano de Haim Rozental, ke moro en Tel Aviv. Rozental guadro estas letras debasho de su kama durante kuarenta anyos. En los anyos dalkavo de 1980s, Rozental kijo vender estas letras a los Federal Archives de los almanes. Ma, en el 1983, la gazeta almana ‘Stern’, aviya publikado el diario de Hitler, i un sierto tiempo duspues, toparon ke este diario no era de Hitler. Por esta razon, los almanes no se enteresaron de los dokumentos de Himmler.
Kuando Rozenthal se izo de noventa anyos, su ijo lo konvensio adarle este material. En el anyo 2007, un komersante de diamantes, David Lapa, los merko a un presio simboliko. David Lapa, se los dio estos dokumentos a su ija, Vanessa, ke es diroktora de sinema, para ke aga un filmo dokumanter sovre Himmler.
En el anyo 2011, el avokato de Vanessa Lapa se adreso a un eskridor del periodiko ‘Die Welt’, i le propozo de publikar este material. Mas tadre, en una reunion kon el eskridor, Vanessa le trusho las letras, i las fotografias de Himmler, ke son dokumentos de los anyos 1927-1945, ke es el anyo ke el Nazi se suisido.
Ente 2011-2014, kon la ayuda de los Federal Archives almanes, ‘Die Welt’ kontrolo la eskriturya de Himmler, i toparon ke estas letras salyeron de la mano del Nazi.
En el Juno 22, 1941, duspues ke oyo novelas sovre la Operasion Barbarossa, ke es la ataka de la Union Sovietika, la ija de Himmler le eskrivio estos biervos a su padre: ‘Esta muy terivle ke vamos a entrar en gerra kon la Rusia. Estavamos de la mezma parte. La Rusia es muy grande. La gerra va ser muy difisil….si keremos ganar’.
Dos diyas duspues del empesijo de la Operasion Barbarossa, kaje kada diya, Himmler se fue a la kaza de Hitler, ma se olvido de una data muy emportante. ‘Ekskuza me, me olvidi muestro aniversario’ le eskrivio a su mujer, ‘munchas kozas afito estos diyas, la gerra fue muy difisil, espesialamente por los SS’s’.
En el Enero 9, 1928, en indose a Munih, en el treno, Himmler le eskrivio a su mujer: ‘La sola koza ke esto pensando es ‘de vengarme’. En el Noel del anyo 1927, le eskrivio: ‘Mozotros somos gerreyadores por libertad. Somos destinados a estar solos en el egzilio’. En el Desembre 30 del mezmo anyo, le eskrivio: ‘No kero mezmo pensar a la grande oror ke se esta aserkando’.
El antisemitizmo de Magda, su mujer, esta aparente en munchas de sus letras: ‘El suzyo judyo’ eskrivio en una de sus letras. ‘Mi povereta, tienes de tener dariyaver kon los judyos, por paras’ le respondio Himmler. Antes de kazarse, Magda aviya vendido a su partener judyo, su parte de una klinika, en Berlin. ‘Un judyo, siempre es un judyo’ le eskrivio Himmler. ‘Si solo te puediya ayudarte’.
El 14 Novembre del anyo 1938, duspues del Kristallnacht, Magda eskrivio estos biervos en su diario: ‘Kuando mos vana deshar repozados estos judyos, para ke puedamos bivir kon repozo i alegriya?’
En la korespondensia entre Himmler, su mujer i su ija, no ay dingun biervo sovre el jenosido kontra el puevlo judyo, ni sovre los kampos de konsantrasion. ‘Me va ir a Auschwitz’ eskrivio Himmler, ‘en unos kuantos diyas, va estar en Lublin, Auschwitz, Lviv, i duspues en otras partes. No se si te va pueder telefonarte…pasa un ermozo viaje kon muestra ijika…munchos bezos’.
