Yitro

Rav Yeuda ADONİ Köşe Yazısı
15 Ocak 2014 Çarşamba

Yitro suegro de Moshe Rabenu. Tuvyendo avizo de todo lo ke paso dizde ke solyo el puevlo Djudyo del Ejipto, i todos los milagros ke izo el Kriyador a los Djudyos por mano de Moshe Rabenu tomo a Tsipora su ija mujer de Moshe Rabenu i a sus dos ijos.

Gershom i Eliezer i se fue para el dizyerto al monte de Horev por verlo a Moşe Rabenu i ayegarsen kon el i saver todos los pasajes en detalyo.

Arivando al monte de Horev, mando avizarle a Moshe de su vinida. Tuvyendo avizo Moshe Rabenu de la vinida de su suegro, salyo al punto de Refidim a su enkuentro, el i todos los grandes personajes de el puevlo Djudyo i lo resivyo kon mucho respekto i le izo las onores meresidas. I le konto todos los pasajes en detalyo dizde el diya ke se esparto de el fin este diya.

Yitro se allegro muy mucho de sintir todo esto, i Bendiso al Kriyador rekonasyendolo por sinyor de todo el mundo i resivyo sovre si de kreer en el solamente i guadrar sus enkomendansas, i kedo en el dizyerto kon Moshe Rabenu.

Despues de un mez i medyo ke salyo el puevlo Djudyo del Ejipto en el primo diya del mez sivan, partyeron de Refidim i arivaron al dizyerto de Sinay i pozaron enfrente del monte Sinay en este luguar, deklara el todopoderozo al publiko por boka de Moşe Rabenu, ke el Kriyador eskojo en este puevlo komo un trezoro, vozotros vites muy byen dize el Kriyador lo ke ize por vozotros a los ejipsyanos, i ke vos trushe asta aki kon muncha siguridad komo sovre a las de agilas i agora, si vozotros keresh ovedeser mis ordenes i konservar mi firmamyento kon vozotros, de ser mi puevlo fidel alora vozotros seresh konsidirados mi trezoro i me seresh muy keridos, ma a kondisyon ke devesh ser una nasyon de koanim (servitores del Kriyador) i un puevlo santo. Sintyendo estas palavras el puevlo, de boka de Moshe Rabenu, respondyeron todos a una kon el mas grande antuzyasmo. “Todo lo ke mos enkomenda el Kriyador vamos a ovedeser” ansi vemos en la perasha el deklaramyento de los aseret adiberot, los dyes komandamyentos.