Las selebrasıones del primer diya enternasional de ladino

Dora NİYEGO Judeo-Espanyol
11 Aralık 2013 Çarşamba

Primer Diya Enternasional de Ladino se selebro en munchas partes del mundo kon munchas aktividades.

Miembros del siteo Ladinokomunita mos mandaron detalyos de las selebrasiones de este diya ke tuvieron lugar en sus sivdades.

Gloria Asher, de Boston: ‘Ya selebrimos el Dia en manera halis sefaradi: en echando lashon, en komiendo muestras kumidas,, en partajando poezias, en kantando endjuntos, en enkontrando a muevos amigos ...yo i mis elevos - muevos ladinoavlantes, i musafires spesiales, personas ke se engrandesieron kon la lingua i la kultura ke moran serka de Boston’.

Leon Benatov, de Sofia: ‘Celebración en la presencia de cerca 150 personas. Vinieron el embasador de

Israel, el vice embasador de España, tres personas del instituto Cervantes en Sofía, representes de la escuela ande ambezan Español, el presidente de la organización “Shalom” del los djidios en Sofía. Un programa ermoza con exhibición de publicaciones del club “Ladino” i kon proverbas, muncha muzika, poezia, en el kavo un grupo de creaturas ke cantaron “8 candelicas”.

Devin Naar, de Seatle: Mas de 300 personas-profesores i elevos; miembros de la komunita entera komo djudios i non-djudios; Sefaradim i Ashkenazim; mujeres, ombres i kriaturas; relijiozos i non-relijiozos; mansevikos i viejos; los hahamim de muestras keiloth, reprezentantes del governo del estado de Washington, i el konsul de Espanya - todos eyos se adjuntaron para fiestar muestra lingua i muestra kultura. Prezentamos deklarasiones ofisialas, tekstos istorikos, poezias, refranes, kuentos, kantigas, i mas, i al fin, komimos komidas sefaradias komo bumuelos, burekitas de kalavasa, baklava i biskochos.

Dr. Selim Salti, en un mail, mos eskrivio sovre las selebrasiones en İsrael: ‘Oy 5 desiembre se fiesto kon muy grande sukseso i alegria el Primer dia Internasyonal del Ladino. Kon Una asistensia inkreible de kuaje 800 personas, todo - moderasyon, deskorsos, video-mesajes de los EE UU, de Argentina, de Fransia, etc.  sketches, kantikas i programa artistiko, talieres de kuentos i de kantar: todo todo en Ladino o Djudeo Espaniol.

Las palavras de aviertura, por el presidente Navon. Y. Selim Salti, del Dr. Eliezer Papo, las presentasiones del Embasador  de Espania en Israel, Moshe Shaul i del Prof. Shmuel Rafael, todas de buena humor i yenas de optimizmo para el futuro.

El kurto teatro enkavesado por Jojo Eskenazi ke vino de Istanbul izo “pishar de la riza” a toda la asistiensa.

En el intermezzo de dos oras, dos talieres, Uno kon Matilda Cohen Sarano para konsejikas i el otro kon el kantador Kobi Zarco para kantar estuvieron muy bien atendidos.

En la session de despues de medio dia, se distribueron diplomas i medalia del Ladino a los grupos ke se organizaron en 10 sivdades de Israel i tienen varias aktividades todas en Judeo Espaniol. El grupo de “Los Pasharos Sefaradis” ke vino de Istanbul, kon Karen Gershon i Izzet Bana komo kantantes alegraron  al publiko ke durante 7 oras tomo plazer, i se aparto del anfiteatro Wohl konvensido ke el Judeo Espaniol i la Kultura del Ladino tiene un buen futuro, kon un publiko mundial i akademikos de valor’.

En Estanbol, el Diya Enternasional de Ladino se selebro en el Muzeo de la Fondasion 500, la noche del siete de Desembre. Muestra kolaboratora Şeli Gaon estuvo prezente en la selebrasion. Muncha djente asistieron a la nochada. El muevo i el viejo konsül de Espanya, el konsul de İsrael Moshe Kamhi i Pablo Asuero asistieron a las selebrasiones. Silvyo Ovadya i Karen Gershon dieron un deskorso. El Grande Rabino tambien dio un deskorso. Şeli Gaon i Verjel İşman kontaron en Ladino, memorias de un tiempo. Del barkovizyon se prezento kantikas en Ladino. Uvo tambien una ekspozision de las pinturas de Esti Saul. A la fin del programa, Moris Levi remersio a todos por esta ermoza nochada.

Esperamos ke kada anyo, este diya espesial va kontinuar a selebrarse kon ermazas aktividades.