Bamidbar

Rav Yeuda ADONİ Köşe Yazısı
8 Mayıs 2013 Çarşamba

Despues de la salidura del Ejipto i ke ya se kompleta el tabernaklo, (Mishkan) ya era el tyempo de formar a el puevlo ke fue 400 anyos esklavo, komo un puevlo organizado i tambien aunado...

Ke manera puediya devinir un puevlo ke fue anyosveye esklavo, a un pevlo endependyente? La demanda ke demando Paro a Moşe Rabenu en la salidura del Ejipto fue ken i ken vaja salir? La repuesta de Moşe Rabenu fue el puevlo entero. Nuestros mansevos i nuestros vyejoz. Nuestros ijos i nuestras ijas. Kon estas palavras Moşe Rabenu kijo dizir nozotros semos un puevlo.

En la peraşa ‘Bamidbar’ meldamos ke el Kriyador enkomenda a Moşe Rabenu de kontar la kuento de el puevlo Djudyo. El sinyor de Raşi piya sovre este syeto dizyendo: De la estima ke tyene el Kriyador por el puevlo Djudyo, syempre kere saver la kuenta. Kuando salyeron de el Ejipto los konto, kuando muryeron en el pasaje, de el bezero de ora por saver los ke kedaron los konto i kuando se termino el Tabernaklo i pozo su divinidad sovre el puevlo los konto por saver la kuenta de el puevlo.

Dizen muestros savyos: Ke el Kriyador no kijo pozar su divinidad ni sovre las mares ni sovre las montanyas, sino en el dizyerta de Sinay ke era el monte mas chiko. Por enbezarmos ke es muy enportante de seer umilde. I la veluntad de el Kriyador es: De seer nozotros umildes, komo un dizyerto estonses la persona puede deprender la Tora.

Ansi eksplika el savyo Rav Hida de bendicha memorya, *zehuto yagen alenu”. La dadiva ke se dava al santuvaryo medyo şekel, senbolizava a la persona ke se konsedira ke el ainda es medyo deve de azer esforsos por komletarse en el estudyo de la Tora, i en sus kualidades.