LA GRANDE SHAKA DEL OSCAR

Dora NİYEGO Judeo-Espanyol
6 Mart 2013 Çarşamba

Los eskridores de la transmision del Oscar, kada vez, azen shakas sovre los judyos para akodrarmos ke ‘los judyos kontrolan el Hollywood’. Mezmo azer shakas sovre este sujeto es danjerozo.

Este anyo, el aktor Mark Wahlberg i su amigo, ‘el lonso Ted’ iziereron la grande shaka judiya de akeya noche. No solo se burlaron del poder judyo en Hollywood, ma, en mezmo tiempo, kijeron amostrar ke el kriter de entrar a Hollywood, es de tener un nombre judyo, i de ser un filantropisto por İsrael.

Esto kopyando una parte de la konversasion entre Ted i Mark Wahlberg.

Ted – Mira este todo talante en un solo lugar. Ay Daniel Day_Lewis, ay Alan Arkin, ay Joaquin Phoenix. Saves lo ke es enteresante? Todos estos aktores son medyo-judyos.

Mark – Oh, ok.

Ted – İ tu? Tienes un ‘berg’ a la fin de tu nombre? Sos judyo?

Mark – So judyo? No. So katoliko.

Ted – Yerrada repuesta.

Mark – Kualo?

Ted – Keres lavorar en esta sivdad? Es enteresante Mark, porke yo so judyo.

Mark – No, no sos.

Ted – Si, yo so judyo. Nasi Theodore Shapiro, kero azer dono a İsrael, i kero kontinuar a lavorar en Hollywood por siempre. Te remersyo, yo so judyo.

Mark – Tu sos un bovo.

Ted – Bueno, vamos a ver ken es bovo, kuando me vana dar un avyon privado para ir a  la reunion sekreta de la Sinagoga.

Este dialog no parese muy orijinal. Las alkunyas judiyas, el ayudo por İsrael, las reuniones sekretas de la Sinagoga no son muevas por los antisemitos.

Foxman, el direktor jeneral de ADL, disho ke este teksto no es komik del todo. ‘En reenforsando viejos stereotipos judyos, estan lejitimando el antisemitizmo’ disho Foxman. ‘Esto no es la primera vez ke se estan burlando del poder de los judyos en Hollywood’.

Rabbi Marvin Hier, fondador i direktor del Sentro Wiesenthal, esta diziendo ke ay poka diferensia entre burlar del ‘poder juyo’, i dizirlo. En estos diyas ke el antisemitizmo esta tan fuerte en el mundo entero, azer este modo de kozas en el Oscar, i dizirlo delantre de miles de espektatores, va azer kreer el mundo entero ke es verdad ke los judyos kontrolan Hollywood. Siguro ke los ke estan ariento del echo de Oscar, no lo toman por seryozo. Ma por los miliones ke suivaron el Oscar de la televizion akeya noche, azer este modo de shakas es enganyarlos kon una mintira, i tener negra entinsion de promotar el antisemitizmo. Segun Marvin Hier los komedienes tienen el derecho de libertad en las shakas ke azen, ma no tienen el derecho de promotar el antisemitizmo.