Bo

Rav Yeuda ADONİ Köşe Yazısı
25 Ocak 2012 Çarşamba

 Ala dyezena yuga, MAKAT BEHEKOT no pude pero suportar asta el kavo, i se  le ablando un poko su korason. İ despues de sufriyir bastante ke todos los ijos mayores (Bohorot) de los Ejipsyanos, sin diferensya de chiko a grande fin el ijo de Paro, muryeron  todos de uno en la medya de la noche  de 15 de Nisan. Paro fue forsado de parte todo su puevlo de yamar akel momento a Moşe i a Aaron i regarles ke salyeron eyos i todos los cudyos del Ejipto i ke rogaran por sus vida.

En la medya noche del 15 Nisan de este anyo, mando a dizir Paro a todo cudyo ke se topavan en la tyera  de Geshen ke eyos eran liberos. Ke ya puedrian salir de Misrayim, a el punto los cudyos  ke ya estavan prontos esperando esta ora.Se rekojeron todos kon prisa en el kartie Raamses la manyana en el 15 Nisan salyeron todos los Cudyos del Ejipto kon grande koraje i alegriya despues de aver en este pais 210 anyos.

La suma del puevlo ke salyeron del Ejipto era komo 600.000 personas de ombres de 20 anyos para ariva, fin a 60 anyos .En desparte de mansevos manko de vente vyejos mas de 60 anyos, mujeres i kreaturas akel diya salyeron tambien muncha cente de otros puevlos ke estavan en el Ejipto i se acuntaron kon el puevlo cudyo.

El puevlo Ejipsyano konosyendo a los kavos la grande encustisya ke kometyeron kon los cudyos en luguar de tantas buendades ke vyeron de el, i vyendo ke ay Dyos en los syelos. Ke paga a kada una sigun su ovra. Kijeron afalagarsen un poko kon eyos i les fueron regalandoles muncha plata i ora i pyedras presyados i munchas kozas valutados. İ les aziyan demandar todo lo ke teniyan menester para darles en tal de afalagarlos. Ansi salyeron los cudyos de Mistrayim. Kon muncha rikeza. Sigun se loprometya a Avraam Avinu kuando le avizo lo ke teniya de arivar a sus ijos.