Vayigaş

Rav Yeuda ADONİ Köşe Yazısı
28 Aralık 2011 Çarşamba

Los ermanos de Binyamin i partikularmente Yeuda, el garante de su padre, no se vana kontentar, tan presto, kon esta grasya, del podestador del Ejipto. Enpesan alora amostrar sus valor, i sus baraganiya. İ Yeuda sovre todo, se mete a konvensar kon Yosef kon buenas i kon malas. İ le da a entender, ke kale ke se yeve sano a Binyamin onde su padre.

Alora se konvensyo byen Yosef, ke sus ermanos verdadmente se vana entregar a la muerte por uno de eyos. İ ke esto demostra por siguro ke ya se tuvyeron repintido de lo ke izyeron, kon el. İ no pudyendo mas suportar, se dyo a konoser a sus ermanos, kon muncha fineza i se abrasaron i yoraron de aparte aparte. Al punto tuvo, para avizo, de esto i los grandez del palasyo i se gustaron muncho, de saver ke sus podestador i rijidor es de una famiya la mas onorada del mundo, i no es un ombre perdido o esklavo sigun pensavan fin agora.

Yosef les dyo regalos i dadives a todos sus ermanos, para toda la famiya. I kon orden de Paro mando a sus ermanos kon karosas del palasyo onde Yaakov su padre, por azerlo vinir a Mistrayim. Para ke biva el resto de sus diyas kon repozo alado de su ijo kerido.

Los ermanos de Yosef no perdieron tyempo i se fueron todos a una yenos de alegriya i gozo onde Yaakov sus padre i sigun les enkomendo Yosef se rijeron de no darle avizo a Yaakov al punto del echo de Yosef.

Yaakov no kijo kreer tan presto sus palavras ni las palavras de sus ijos. Pero, vyendo las karosas i las regalos ke le mando su ijo, se konvensyo por siguro ke es verdad lo ke dizen i se arebivyo su korason i kovro fuersa i alegriya todos los moradores de Kenaan ke savian la ansya de Yaakov se alegraron de sintir esta buena nuvela. I les izo konbite tres diyas.