Un regalo espesıal al Kuplo Real

Dora NİYEGO Judeo-Espanyol
4 Mayıs 2011 Çarşamba

Komo todos lo savemos, la boda del Prens William i Kate Middleton se realizo en la Eglizia Westminister en Londra, en el Avril 29th. Milliones de djente en el mundo entero suivaron la boda de la televizion. Serka un million de djente vinieron de todas las partes de la Angleterra, i asperaron en la salida de la Eglisia Westminister, para ver el kuplo royal de serka. La djente alegre aplodisaron los muevos kazados saliendo de la eglizia, i en indo al Buckingham Palace en el koshe a kavayos. Mas duspues, komo es tradisional, el kuplo salyo al balkon, i se bezaron en frente de la djente. Aviones del Air Force de la Anglettera pasaron del sielo por selebrar este ermozo momento. Dos mil envitados asistieron a la boda. Entre los envitados uvo sukuenta personajes de diversos estados, membros de organizasiones de charidad, veteranos de gerra, i paryentes del kuplo. Suguro ke el kuplo resivieron munchos regalos presiozos, ma uno de estos regalos fue muy orijinal.

El Prens William i Kate Middleton resivieron un regalo de boda ke se resive muy ralo en estas okaziones. Este regalo es una Ketuba, ke es el kontrakto de kazamiento de los judios.

El artisto i kaligrafo de orijin britaniko, ke bive en Yerushalaim, Michael Horton aparejo una Ketuba por el kuplo royal, eskrito en ebreo i en ingles. El teksto de la Ketuba fue un poko modifikado para una boda en la eglisia. Los biervos ke son espesialamente judios fueron eliminados. Ma, tambien, el teksto fue estilizado en un formato tradisional judio kon los diez komandamentos en el empesijo de la oja, el sembol del Leon de Juda a la derecha, i a la siedra un sembol de la armada britanika (ke no es tradisional por una Ketuba judia).

La eskrituria ebrea fue eskrita, komo es tradisional, kon una kaligrafiya elegante ke se empleya para eskrivir otros tekstos relijiozos judios, komo es eskrito en el Rulo de la Tora, i en la Mezuza.

En la Ketuba, se topa tambien, las fotos del Templo del Rey Salamon, i la foto del Rey David djugando la arpa, i tambien una foto de la Eglisia Westminister ande se kazaron William i Kate.

En todo, la Ketuba fue modifikada por ser elagitarian i no relijioza. El teksto fue eskrito por un Rabino, i fueron bazado en prensipos egalitarios: ‘Komo keridos i amigos, estomos prometiendo de kerermos bien, de onorarmos, i de apuyarmos uno al otro. Vamos a estar siempre avierto i onesto’.

Segun la gazeta Jewish Chronicle,una otra trdision judiya iva ser aplikada en la boda. William  rompiendo una kupa a la fin de la seremoniya. Unas kuantas tradisiones ajenas a los kristianos, fueron aplikadas komo ‘un ermozo jesto’ a las otras tradisiones. Un poko de mehendi (kina) fue untada en la mano de Kate antes de la boda, komo parte de un ritual muslumana. Kostumbres Hindu tambien fueron aplikados.

El diya de la boda royal fue un diya muy ermozo por la Angleterra i por el mundo entero. Komo todos, i mozotros oguramos ke el PrensWilliam i su mujer Kate bivan una vida oroza.