Kedoşim

Rav Yeuda ADONİ Köşe Yazısı
27 Nisan 2011 Çarşamba

No agas tortura en el cuisyo, no resivas las fases del prove, no onores las fases del grande, kon custedad cuzgaras a tu konpanyero. -Vayikra-19-15.

Raşi eksplika  este verseto kon un konsejo ke meldamos en los perakim. Cuzga kon endüljensa.

Toda kriansa kuando vino Natan Anavi (el profeta) a kastigar a David el rey, le konto un egzempyo, dizyendo: En una sivdad moravan dos personas, el uno poderozo i el uno menesterozo. El poderozo posedava munça kuatropea. El menesterozo teniya solo un kodreriko çiko, ke pudo merkar. El poderozo izo encenyos i se lo tomo el kodreriko del menesterozo. Kuando sintyo David Ameleh estas palavras de Natan Anavi se revolto i dişo: Esta persona merese muerte. Natan Anavi le dişo a David Ameleh esto ke te. Konti es un egzempyo. Sino ke esta persona sos tu. ?emuel (2-12).

Ansi es uzo de los syelos, kuando la persona se cuzgua por algun pekado le amostran un pekodo semejante en otra manera en una persona diferente, estremesyendo puede entender el yerro grande ke izo en su vida, i resive el cuzgo sovre si.

Por esto, dişeron muestres savyos en Pirke Avot. No cuzges a tu konpanyero, sin estar en la situasyon ke el se topa. Devemos de saver, el yerro ke izimos. Molo amostran en otra persona para ke nos cuzgemos a nozotros mizmo. Si nozotros cuzgamos a nuestro proksimo kon endüljensa, de los syelos nos cuzgan a nozotros kon endüljensa.

David Ameleh en uno de sus salmos dize (Teilim 39-9). Eskapame de todos mis reveyos, no me asemejes por repudyo de inyorente. No me metas en un rango kon personas negras ke azen malisya, i eskapame de mis yerros.

No andes mişilikando en tus puevlos, la persona ke avla mal. Kontra su konpanyero kavza mal, a si mizmo i a su konpanyero i a los oyentes. Porke vemos en la kontenuasyon del verseto: No te pares kontra la sangre de tu konpanyero, kere dizir en avlando mal kavzas la muerte de ti, del oyedor, i de tu konpanyero. Dunke afirmaremos el buen konsejo ke meldamos en los Perakim. Resive a toda persona kon kara alegre.