Metsora-Taara

Rav Yeuda ADONİ Köşe Yazısı
6 Nisan 2011 Çarşamba

Los  perashiyot – Tazriya i Taara nos enbeza lo bueno ke trae a la persona,el avlar bueno i de entremeterse el ombre en la Tora i azer mitsvot i maasim tovim ,ovras de byen. Estonses el ombre tyene buena paga de parte del Kriyador. A la kontra si es auzado el ombre a avlar Lashon ara palavras non buenas por su konpanyero ,i raportar biervos ke puede traer danyo a su serkano, la pena es muy fuerte.

Un verseto dize: La vida i la muerte esta dekolgado en la alguenga de la persona. El ombre si aze esforsas de kitar de su boka palavras ke fraguan i no destruyen, alarga anyos de bivir. La kontra de bivir esta manera es kondenarse a si mismo.

El biervo Tsaraat-Lepra ke es el nombre de la perasha Metsora: Lo eksplikan nuestros savyos Motsi Shemra, kitar fama mala. Kere dizir el ke kita fama mala por su konpanyero el se apena kon una yaga ke es yamada Tsaraat. Dunke kitar koza mala de la boka es apenarse la persona a si mismo. Dizen nuestros savyos la espada puede dar fin a la vida de la persona ke esta serka. La alguenga de la persona puede danyar a el ke esta muy leshos de el. Avlar mal es igual a los pekados de sirvir idolos i verter sangre.

Miryam la ermana de Moshe Rabenu se yago kon yagas de lepra porke avlo kontra Moshe Rabenu. De este fakto puedemos entender, ke es muy fuerte la pena de avlar kontra alguna persona.

El leprozo despues ke se milizino deviya de traer dos pasharos a el santuvaryo. Ansi se puede eksplikar komo los pasharos chuchulean kon sus bokas.

Dizen nuestros savyos: Una persona puede danyar a su enimigo kon la espada si esta serka de el ma kon la alguenga lo danya malgrado ke se topa muy leshos de el. Avlar mal kere dizir lashon ara, entra en un grupo de pekados muy Fuertes komo, sirvir idoloz, avada zara, i verter sangre. Miryam la ermana de Moshe Rabenu se apeno kon yagas de lepra pork e avlo por Moshe Rabenu.

Komo sufre el kuerpo de el ombre, kon diferentes hazinuras, i la alma de el ombre sufre de hazinuras. David Ameleh en uno de los salmos de Teilim dize: “Refaa nafshi ki hatati lah” Melizina mi alma porke peki kontra ti.

Los dezrepozos, los angustyos ke vyenen sovre el ombre deve de azerlo pensar, i tornarlo a un buen kamino.

Si puedemos entender el buen doktrino de la Tora i de nuestros savyos, estonses vamos a ser bien aventurados, i vamos a tener muncho bueno. Si tienemos buena entisyon, El Kriyador syempre no ayuda i nos ayudara syempre.

Amen.