Studio genetiko sovre la koneksion genetika de los Judios

Dora NİYEGO Judeo-Espanyol
16 Haziran 2010 Çarşamba

Eske las populasiones judias dispersadas en el mundo entero, aparte las praktikas relijiozas i kulturales, tienen una koneksion genetika?

Los investigatores de genetika, en New York, i en Tel Aviv, realizaron un estudio genetiko enriva de 237 personas de siete komunidades judias; de İran, İrak, İtalia, Gresia, Turkiya, Siria, i del este de Evropa, i izieron tambien una komparezon kon los no-judios en las mizmas rejiones jeografikas. Segun los rezultados, kada komunidad judia tiene una distinksion genetika, ma tambien tiene una fuerte koneksion kon los no-judios vizinos los mas serkanos, ke son los italianos en el lado de la Evropa, i los durzus, los beduines, los palestinianos en el lado del Oriente Medio. Esta koneksion genetika es el rezultado de la meskla de las populasiones judias kon sus viziones.

Diferentes estudios genetikos se realizaron en los ultimos anyos. En estos estudios, los investigatores analizaron el kromozom X ke se transmete de la madre, i el kromozom Y ke se transmete del padre. Ma este muevo estudio es el primer ke arekojo endjuntos todas las espesialidades genetikas en un kadro grande.

Segun los investigatores, este estudio genetiko, va konfirmar u va deskreditar el orijin judio i la istoria judia, amostrando evidensias de la dispersion de las populasiones judias en la Evropa, i en el Oriente Medio. Los eventos de la diaspora judia se vana pueder provar kon evidensias genetikas. Por egzamplio, segun la istoria, los judios ashkenazis son, en grande parte, desendientes de los Hazares ke se konvertieron al judaizmo, ma la koneksion genetika entre los judios evropeenos, i los judios del Oriente Medio, no esta konfirmando esta teoria.

Los investigatores estan estimando ke la divizion genetika entre los judios evropeenos, i los judios del Oriente Medio, se produizo 100-150 jenerasiones antes (2500 anyos), kuando las komunidades judias se establiseron en Persia, i en Babilon. Los investigatores estan tambien estimando ke la meskla genetika entre los judios ashkenazis i sus vizinos, se produizo en epokas mas serkanas, korespondando al dizimuevien siglo, kuando la populasion judia evropeena, pujo de 50 mil a 5 miliones de personas.

En este estudio genetiko, tambien se va pueder azer una analiz medika, de las hazinuras komo el kanser de prostat i de pecho, i las hazinuras nevrotikas komo el Parkinson i la hazinura de Crohn, i otras hazinuras ke se rankontra muncho en los judios.